فرمان الہی
نماز کے اوقات
امریکا میں طیارہ حادثے میں ہلاک ہونے والی خاتون پائلٹ این تھو نیوین کا موت سے قبل آخری پیغام سامنے آگیا۔
امریکی ریاست انڈیانا میں چھوٹا طیارہ گر کر تباہ ہوگیا، حادثے میں خاتون پائلٹ ہلاک ہوگئی، اپنی موت سے قبل اس نے فیس بک پر آخری ویڈیو شیئر کی تھی جو سوشل میڈیا پر وائرل ہوگئی ہے۔
امریکی میڈیا کے مطابق 44 سالہ ویتنامی پائلٹ این تھو نیوین کا طیارہ انڈیانا کے شہر گرین ووڈ میں گر کر تباہ ہوگیا، وہ تنہا دنیا کا چکر لگانے والی پہلی ویتنامی خاتون پائلٹ بننے کے مشن پر تھی۔
طیارہ گرنے کا حادثہ انڈی ساؤتھ گرین ووڈ ایئرپورٹ سے روانگی کے فوراً بعد پیش آیا، طیارہ فضا سے گھومتا ہوا ایک پیٹرول پمپ کے پیچھے گرا، خاتون پائلٹ طیارے میں تنہا تھی، جو موقع پر ہی دم توڑ گئی۔
این تھو نیوین کا اپنی آخری ویڈیو میں کہنا تھا کہ میں آج انڈیانا سے پنسلوانیا کیلئے اپنی دوسری پرواز پر روانہ ہورہی ہوں، اس موقع پر میں کافی خوش ہوں، آپ سب سے گزارش ہے اس سفر میں میرا ساتھ دیں کیونکہ میں ایک تاریخ رقم کرنے جارہی ہوں۔
ان کا کہنا تھا کہ ’’یہ صرف ایک پرواز نہیں، ایک مشن ہے اگلی نسل کی ایشیائی خواتین پائلٹس اور انجینئرز کے لیے، آئیے ہم سب آگے بڑھتے رہیں۔"
خیال رہے کہ ویتنامی پائلٹ کا یہ سفر 27 جولائی کو امریکی شہر اوشکوش، وسکونسن سے شروع ہوا تھا۔ انڈیانا کے بعد ان کی اگلی منزل پنسلوانیا تھی، جہاں پہنچنے سے قبل ہی حادثہ پیش آگیا۔
این تھو نیوین نے پرڈیو یونیورسٹی سے ریاضی میں بیچلر اور ایروناٹکس و ایسٹروناٹکس میں ماسٹرز کیا، جبکہ جارجیا ٹیک سے ایرواسپیس انجینئرنگ میں ڈاکٹریٹ کی ڈگری حاصل کی، وہ ڈریگن فلائٹ ٹریننگ اکیڈمی کی چیف انسٹرکٹر بھی تھیں۔
آنجہانی پائلٹ نے 2018 میں "ایشیائی خواتین برائے ایرواسپیس و ایوی ایشن" کے نام سے ایک غیر منافع بخش تنظیم بھی قائم کی تھی، جس کا مقصد ایشیائی خواتین کو ہوا بازی کے میدان میں با اختیار بنانا تھا۔
