فرمان الہی
نماز کے اوقات
پاکستان کی معروف اداکارہ صبا قمر کی شوٹنگ کے دوران اچانک طبیعت بگڑ گئی، جس کے بعد ان کو فوری طور پر قائداعظم انٹرنیشنل اسپتال راولپنڈی منتقل کر دیا گیا۔
میڈیا رپورٹس کے مطابق صبا قمر کو آئی سی یو (انتہائی نگہداشت وارڈ) میں داخل کیا گیا، جہاں ڈاکٹروں نے ایمرجنسی میں متعدد طبی اقدامات کیے، جس میں انجیوگرافی بھی شامل تھی۔
ڈاکٹروں نے تصدیق کی کہ اسپتال پہنچنے کے وقت اداکارہ کی حالت نہایت تشویشناک تھی اور فوری طبی امداد نہ دی جاتی تو صورتحال جان لیوا ہو سکتی تھی، تاہم بروقت علاج اور مکمل نگرانی کے بعد ان کی طبیعت سنبھل گئی اور انہیں اسپتال کے وی آئی پی روم میں منتقل کیا گیا۔
رپورٹس ذرائع کا حوالہ دے کر بتایا گیا کہ صبا ایک بڑے پروجیکٹ پر مسلسل کام کر رہی تھیں اور شدید ذہنی دباؤ اور تھکن کا شکار تھیں، ڈاکٹرز کا کہنا ہے کہ ان کی حالت زیادہ کام اور نیند کی کمی کے باعث بگڑی۔
صبا قمر کی حالت اب بہتر ہے اور انہیں اسپتال سے ڈسچارج کر دیا گیا ہے، ڈاکٹروں نے انہیں کئی ہفتے آرام کرنے اور جسمانی مشقت سے پرہیز کرنے کی ہدایت کی ہے تاکہ مکمل صحت یابی ممکن ہو سکے۔
انسٹاگرام پر اداکارہ نے ڈاکٹرز کی ٹیم کے ہمراہ تصویر شیئر کی جس میں مداحوں سے پیار اور محبت کے اظہار پر شکریہ ادا کیا ہے۔
انہوں نے اپنی انسٹا اسٹوری میں اپنی صحت سے متعلق اپ ڈیٹ دیتے ہوئے لکھا، ’سب کے پیار اور دعا کا بےحد شکریہ، میں بلکل ٹھیک ہوں اب، بس تھوڑا سا بریک لیا تھا، اب واپسی ویسے ہی ہوگی جیسے کبھی گئی ہی نہ تھی اور نہ ہی میں کہیں جارہی ہوں۔‘
اداکارہ کے مداحوں اور شوبز حلقوں کی جانب سے ان کی جلد صحتیابی کے لیے سوشل میڈیا پر نیک تمناؤں اور دعاؤں کا سلسلہ جاری ہے۔
