فرمان الہی
نماز کے اوقات
دوسرے ٹی ٹوئنٹی میچ میں پاکستان نے ویسٹ انڈیز کو جیت کے لیے 134 رنز کا ہدف دے دیا۔
امریکی ریاست فلوریڈا کے شہر لاؤڈرہل میں کھیلے جارہے دوسرے میچ میں پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 133 رنز بنائے۔
پاکستان کی جانب سے حسن نواز 40 رنز بناکر نمایاں رہے، کپتان سلمان آغا نے 38 اور فخر زمان نے 20 رنز کی اننگ کھیلی۔
قومی ٹیم کے دیگر بیٹر کوئی خاطر خواہ کارکردگی نہیں دکھا سکے، صائم ایوب 7، صاحبزادہ فرحان 3، محمد حارث 4، حسن علی 8 اور محمد نواز 2 رنز بناکر آؤٹ ہوئے۔
شاہین شاہ آفریدی 2 اور سفیان مقیم نے 1 رن اسکور کیا جبکہ فہیم اشرف بغیر کسی رن کے آؤٹ ہوا۔
ویسٹ انڈیز کی جانب سے جیسن ہولڈر نے 4 اوورز میں 19 رنز دے کر 4 وکٹ حاصل کیے۔
قومی ٹیم میں حارث رؤف کی جگہ حسن علی کو شامل کیا گیا ہے جبکہ ویسٹ انڈیز کی ٹیم میں بھی دو تبدیلیاں کی گئی ہیں۔
پاکستان کو تین میچوں کی سیریز میں ایک صفر کی برتری حاصل ہے۔
واضح رہے کہ پہلے ٹی ٹوئنٹی میچ میں پاکستان نے ویسٹ انڈیز کو 14 رنز سے شکست دی تھی۔
