فرمان الہی
نماز کے اوقات
کراچی کے علاقے لانڈھی میں موجود ایکسپورٹ پروسسنگ زون کی فیکٹری میں آگ لگ گئی، آگ لگنے کے باعث فیکٹری کی پوری عمارت گر گئی۔
آگ بجھانے کے لیے شہر سے فائر بریگیڈ کو طلب کر لیا گیا ہے۔
آگ کو لگے 3 گھنٹوں سے زائد کا وقت گزر گیا ہے۔ ریسکیو کے مطابق عمارت کا حصہ گرنے سے فیکٹری کے باہر موجود 7 افراد زخمی ہو گئے۔
فائر بریگیڈ حکام کا کہنا ہے کہ آگ کو پھیلنے سے روک دیا گیا ہے اور فیکٹری سے ملازمین کو نکالا جا چکا ہے جبکہ اطراف کی فیکٹریوں کو بھی خالی کروالیا گیا ہے۔
حکام نے کہا کہ آگ بجھانے کے عمل میں 12 فائر ٹینڈر، 2 واٹر باوزر اور 2 اسنارکل حصہ لے رہی ہیں۔
وزیراعلیٰ سندھ مراد علی شاہ نے لانڈھی ایکسپورٹ پروسیسنگ زون میں آتشزدگی کا نوٹس لیتے ہوئے کہا ہے کہ قیمتی انسانی جانوں کے تحفظ کو اولین ترجیح دی جائے۔
مراد علی شاہ نے فائر بریگیڈ اور ریسکیو اداروں کو فوری اقدامات کرنے کی ہدایات کرتے ہوئے کہا ہے کہ فیکٹری مالکان اور مزدوروں کی مکمل معاونت کی جائے۔
وزیر اعلیٰ سندھ کو لانڈھی ایکسپورٹ پروسیسنگ زون فیکٹری میں آتشزدگی پر بریفنگ دیتے ہوئے کہا کہ آگ لگنے کے وقت بڑی تعداد میں ملازمین فیکٹری میں موجود تھے، ریسکیو حکام نے تمام افراد کو بحفاظت نکالا۔آگ لگنے والی گارمنٹ فیکٹری کی 5 منزلہ عمارت زمین بوس ہو گئی۔
مراد علی شاہ نے ریسکیو عملے کی کارکردگی کو سراہتے ہوئے واقعے کی مکمل تحقیقات کی ہدایت کر دی۔
