فرمان الہی
نماز کے اوقات
کراچی(اسٹاف رپورٹر) سی ٹی ڈی نے صحافی کی پھوپھی کے اغواء اورقتل میں ملوث میاں بیوی کو گرفتار کرکے قتل کا معمہ حل کردیا ،تفصیلات کے مطابق سندھ پولیس کے کاؤنٹر ٹیررازم ڈیپارٹمنٹ (سی ٹی ڈی) نے سینئر صحافی شفیع بلوچ کی 60 سالہ پھوپھی کے دو ماہ پرانے اغوا اور قتل کے کیس کا سراغ لگا لیا ہے اور واردات میں ملوث میاں بیوی کو گرفتار کرلیا ہے۔سی ٹی ڈی حکام کے مطابق مرکزی ملزمہ فائزہ نے دوران تفتیش اعتراف کیا کہ اُس نے 28 اپریل 2025 کو لیاری میں صفیہ بی بی کو ان کے گھر میں رسی سے گلا گھونٹ کر اور پتھر مار کر قتل کیا۔ قتل کے بعد ملزمہ نے لاش کو ایک ٹرنک میں بند کرکے غازی ٹاؤن، ملیر کی ایک گلی میں پھینک دیا۔فائزہ نے تفتیش کے دوران بتایا کہ وہ صفیہ بی بی کے سونے کی بالیاں چھیننا چاہتی تھی، جو انہوں نے پہن رکھی تھیں۔ شام کو جب اُس کا شوہر محمود کام سے واپس آیا تو اُس نے اُسے قتل کی اطلاع دی۔ محمود نے اپنے اعترافی بیان میں کہا کہ اُس نے واردات میں استعمال ہونے والا خون آلود قالین عیدگاہ گراؤنڈ کے قریب ایک مسجد کے پاس پھینک کر ثبوت مٹانے میں مدد کی۔سی ٹی ڈی کے مطابق ملزمان نے مقتولہ کی سونے کی بالیاں 70 ہزار روپے میں فروخت کیں، اور یہ رقم محمود نے اپنے پاس رکھ لی۔واضح رہے کہ مسماۃ صفیہ بی بی کے اغواء اور قتل کامقدمہ ابتدائی طور پر ملیر سٹی تھانے میں درج کیا گیا تھا، جس کے بعد تفتیش سی ٹی ڈی گارڈن انویسٹی گیشن ونگ کو منتقل کی گئی۔ سی ٹی ڈی حکام کے مطابق تفتیشی ٹیم نے چند ہی دنوں میں ملزمان کو ٹریس کرکے گرفتار کرلیا، جنہوں نے نہ صرف جرم کا اعتراف کیا بلکہ لاش کو ٹھکانے لگانے اور شواہد مٹانے کا طریقہ بھی بتایا۔
