ہر کوئی اپنے گھر کو باکمال اور باذوق بنانا چاہتا ہے۔ جب بات ٹی وی لاؤنج کی ہو تو سبھی چاہتے ہیں کہ ان کا ٹی وی لاؤنج دوسروں سے اعلیٰ اور منفرد نظر آئے۔ ٹی وی جو کبھی ایک خواہش ہوا کرتی تھی، وقت اور ٹیکنالوجی کے ساتھ اب ہر گھر کی ضرورت بن چکی ہے۔
ٹی وی لاؤنج کی سجاوٹ اور زیبایش کے لیے ٹیلی ویژن کے نت نئے انداز، ڈیزاین اور اقسام متعارف ہوچکی ہیں اور ٹی وی اسکرینوں کے ایل سی ڈی، پلازما، Flat، ایل ای ڈی، Retina، کرسٹل اور تھری ڈی جیسی ٹیکنالوجیز متعارف ہوچکی ہیں۔
قصہ ء مختصر یہ کہ ٹی وی ایک بڑے ڈبے سے خوبصورت فریم میں منتقل ہوکر شاندار اندازاپنا چکا ہے۔ آپ کے ٹی وی لاؤنج کی زیبائش کے لیے کچھ شاندار اور جدید ترین خیالات پیشِ خدمت ہیں۔
بیڈ روم کا ٹی وی لاؤنج
اس بیڈ روم کی شان وشوکت کا مرکزی نکتہ ٹی وی کے لیے مخصوص الماری اور متعلقہ لوازمات کی خوبصورت سجاوٹ ہے۔ خوابگاہ کا بیرونی پس منظر اور سینما سائز کے اسکرین پر وال ٹو وال الماری اور کثیرالمقاصد فرنیچر کی شان ہی نرالی ہے۔
جدید اور جاذبِ نظر
محدود احاطے میں ٹی وی سیٹ اور اس کے جملہ لوازمات منظم کرنے کی ایک مثالی کوشش اس نمونے میں نمایاں ہے۔ سفید اور متناسب رنگوں کے امتزاج اور روشن پس منظر کے ساتھ سینما سائز کے اسکرین کی شان وشوکت، سادگی کے باوجود وقار اور متانت کی علامت ہے۔
دیوار پر لگے اونچے شیلف کے نیچے
ایک چھوٹے لاؤنج میں سامان رکھنے کی جگہ کی اپنی اہمیت ہوتی ہے۔ ایسے میں ٹی وی کو ایک دیوار پر لگائیں اور اس کےنیچے DVDs رکھنے کے لیے ایک اونچا شیلف لگائیں۔
دیوار پر لگے شیلف کے درمیان
یہ چھوٹی اور مکمل طور پر فعال جگہ میں ٹی وی لگانے کا بہترین نمونہ ہوسکتا ہے۔ کمرے کے بیرونی کونے کے ساتھ والی دیوار پر شیلف بنائیں اور شیلف کے درمیان ٹی وی رکھنے کی جگہ بنائیں۔ درمیان میں مناسب فاصلے پر خوبصورت، آرام دہ صوفے رکھیں۔ یہ گھر میں ٹی وی انجوائے کرنے کی ایک بہترین جگہ ثابت ہوگی۔
ایک شاندار نمونہ
محدود احاطے اور وسائل کے ساتھ ترتیب دیے گئے، اس ٹی وی لاؤنج کو مثالی اورماہرانہ انداز میں منظم کیا گیا ہے۔ خصوصاً ٹی وی اسٹینڈ اور ٹی وی پینل کے فرنیچرکو حسبِ ضرورت ڈیزائن کرکے جگہ اور پیسے دونوں کی بچت کی گئی ہے۔ سرخ رنگوں کا امتزاج مرکز نگاہ منظر ہے۔
ٹی وی اسٹینڈ پر
ہر چیز جو بنائی جاتی ہے، اس کی ایک وجہ ہوتی ہے۔ یہ خوبصورت، اعلیٰ ذوق کا بنایا گیا سادہ مگر اعلیٰ ٹی وی اسٹینڈ دیگر لوازمات کے ساتھ مل کر کیا شاندار نظارہ پیش کررہا ہے، اس کا اندازہ آپ بخوبی کرسکتے ہیں۔
اولڈ اِز گولڈ
اگر آپ اب بھی پرانے ڈبہ اسٹائل والا مگر Flatاسکرین ٹی وی سیٹ رکھتے ہیں تو یہ ڈیزائن آپ کے لیے ہے۔ سامنے دیوار کے ساتھ ایک خوبصورت ڈیزائن کا اسٹوریج والا ٹی وی اسٹینڈ رکھیں۔ اس اسٹینڈ کے نیچے اسٹوریج ڈبوں میں کو چاہیں تو آپ نمائش کے لیے استعمال کریں اور سامنے سے شیشوں کے سلائیڈ دروازوں کا انتخاب کریں۔ اگر غیرنمائشی چیزیں اسٹوریج کرنے کا ارادہ ہے تو سلائیڈ دروازوں میں شیشے کے بجائے لکڑی یا بورڈ استعمال کریں۔
ایک شاندار منظر
کریمی اور مدھم رنگ مل کر ایک شاندار بیڈروم بناتے ہیں، باہر موجود سبزہ کو دیکھتے ہوئے آپ یقین کے ساتھ کہہ سکتے ہیں کہ اس سے اچھی جگہ ناممکن ہے۔ یہ ایک بڑا سا روم ہے، جس میں ایک طرف ڈائننگ روم اور دوسری طرف بیٹھک کو سجایا گیا ہے اور دیوار پر ٹی وی اس طرح لگایا گیا ہے کہ اس کا استعمال دونوں مقاصد پورے کرسکے۔ سونے پہ سہاگا، باہر موجود سبزہ کو دیکھتے ہوئے آپ یقین کے ساتھ کہہ سکتے ہیں کہ اس سے اچھی جگہ ناممکن ہے۔
دیوار میں چنوا دیں
آپ کے لاؤنج کا سائز چھوٹا ہے اور آپ صاف ستھرا منظر اور تھوڑی گہرائی چاہتے ہیں تو ٹی وی سیٹ کو دیوار میں چنواددیں۔ یہ انداز آپ کے ٹی وی لاؤنج کو کلاسیکی انداز دے گا۔