فرمان الہی
نماز کے اوقات
باورچی خانے کا نیا فرش بنوانا ایک اچھا خاصا مہنگا کام ہے، مزید برآں، یہ ایک ایسا کام ہے جو آپ کو بہت سوچ بچار کے بعد کرنا پڑتا ہے کیونکہ باورچی خانے کا شمار گھر کے ان حصوں میں ہوتا ہے، جہاں چہل پہل بہت زیادہ رہتی ہے، ایسے میں اس کا فرش ایسا ہونا چاہیے جو دیرپا بھی ہو۔
اگر لاگت کی بات کی جائے تو لکڑی اور قدرتی پتھر کا فرش بنوانے میں سب سے زیادہ لاگت آتی ہے، جبکہ وینائل فلورنگ کی لاگت نسبتاً کم ہوتی ہے۔یہ تو ہوگئی خالصتاً فرش کے مٹیریل کی لاگت کی بات، اگر اس میں اس مٹیریل کو باورچی خانے میں لگوانے کی لاگت کو شامل کرلیا جائے تو مجموعی لاگت دو یا تین گنا تک بڑھ جاتی ہے۔
اگر آپ اپنے لیے نیا گھر بنوا رہے ہیں یا پھر پہلے سے بنے ہوئے باورچی خانے کا فرش تبدیل کرنے کا ارادہ رکھتے ہیں، تو آج ہم آپ کو باورچی خانے کے فرش کی مختلف اقسام سے آگاہ کرنے جارہے ہیں، جن کے بارے میں جان کر آپ کو فیصلہ کرنے میں آسانی ہوگی۔
لکڑی (ہارڈ ووڈ) کا فرش
آپ کا گھر چاہے کسی بھی ڈیزائن اور موڈ کے مطابق تعمیر کیا گیا ہو، ہارڈ ووڈ فلورنگ کو تقریباً ہر ذوق کے لوگ پسند کرتے ہیں۔ لکڑی کے فرش کو آپ بیک وقت کلاسک یا جدید شکل دے سکتے ہیں۔ گہرے رنگ کی لکڑی کا انتخاب آپ کے باورچی خانے کو کلاسک جبکہ ہلکے رنگ کی لکڑی اسے جدید شکل دینے کے لیے استعمال کی جاسکتی ہے۔
لکڑی کا فرش مختلف ڈیزائن کے ٹیکسچر میں دستیاب ہوتا ہے، جبکہ لکڑی کی بھی کئی اقسام ہوتی ہیں، جیسے بلوط، اخروٹ، اور چیری کی لکڑی۔ اس کے علاوہ بانس کی لکڑی کو بھی پائیدار اور دیرپا سمجھا جاتا ہے۔ لکڑی کے فرش کی صفائی بھی زیادہ مشکل نہیں ہوتی۔
کنکریٹ کا فرش
باورچی خانے کے فرش کے لیے کنکریٹ کا استعمال ایک غیرروایتی انتخاب ہوتا ہے، تاہم شہری اور جدید گھروں میں اس کا استعمال خوب جچتا ہے۔ کنکریٹ کو اگر اچھی طرح پالش کرلیا جائے تو اس میں روشنی منعکس ہوتی ہے۔ کنکریٹ کی ایک خوبی یہ بھی ہے کہ یہ نمی کے خلاف مزاحمت رکھتا ہے، یہ دیرپا ثابت ہوتا ہے، اس پر لکیریں یانشانات نہیں پڑتے اور لکڑی کی طرح جلدی خراب نہیں ہوتا۔
کنکریٹ کا ایک اور بڑا فائدہ یہ ہے کہ اگر اس کی درست گراؤنڈ کی جائے تو اس کے دو ٹکڑوں کے درمیان مٹی یا دیگر گندگی بھی جمع نہیں ہوتی، اس طرح باورچی خانے میں نقصان دہ بیکٹیریا بھی پیدا نہیں ہوتے۔ مزید برآں، پاکستان جیسے گرم ملکوں میں کنکریٹ باورچی خانے کو ٹھنڈا رکھنے کا ایک اچھا طریقہ ہوسکتا ہے۔
سرامک ٹائل کا فرش
ٹائل کا استعمال آپ کے باورچی خانے کو ایک منظم انداز بخشتا ہے۔ سرامک ٹائلز مختلف ڈیزائن کے ٹیکسچر میں دستیاب ہیں، جس کے باعث اسے باورچی خانے کے فرش کے طور پر استعمال کرنا ایک پُرکشش انتخاب ہوسکتا ہے۔ سرامک ٹائل کی ایک ذیلی قسم پورسلین ٹائل ہے، جو اپنی پائیداری اور نشانات نہ پڑنے کی خصوصیات کے باعث خاصی مشہور ہے۔
پورسلین ٹائل، گھنی مٹی سے بنائی جاتی ہےاور پھر اسے انتہائی بلند درجہ حرارت پر پختہ کیا جاتا ہے، جس کے بعد یہ قدرتی پتھر سے بھی زیادہ مضبوط بن جاتی ہے، اس میں نمی کے خلاف بھی اعلیٰ مزاحمت پائی جاتی ہے۔ سرامک ٹائل لگوانے کی لاگت تھوڑی سی زیادہ ہوتی ہے لیکن اسے لگوانے کے بعد آپ کو محسوس ہوتا ہے کہ آپ نے تھوڑے زیادہ پیسے لگا کر درست فیصلہ کیا تھا۔
قدرتی پتھر کا فرش
جو لوگ اپنے گھر میں ٹیکسچر کو پسند کرتے ہیں، ان کے لیے باورچی خانے کے فرش کے لیے قدرتی پتھر کا انتخاب ایک فطری بات ہوتی ہے۔ اس کے علاوہ، جو لوگ باہر کی فطری خوبصورتی کے دلدادہ ہوتے ہیں، وہ لوگ بھی اپنے باورچی خانے کے فرش کے لیے عمومی طور پر قدرتی پتھر کا انتخاب کرتے ہیں۔
اگر قدرتی پتھر سے بنے ہوئے باورچی خانے کے فرش کا اچھی طرح خیال رکھا جائے تو یہ انتہائی دیرپا ہوتا ہے اور ایک طویل عرصے تک اسے تبدیل کروانے کی ضرورت محسوس نہیں ہوتی۔ یہ باورچی خانے کے فرش کی ایک اور قسم ہے، جو گھر کو ٹھنڈا رکھنے کے لیے اہم ہوتی ہے۔
ونائل کا فرش
ونائل ایک کثیرالمقصد ٹائل ہے۔ جو لوگ باورچی خانے میں لکڑی کے فرش کی لاگت برداشت نہیں کرسکتے، ان کے لیے ایک پائیدار، سستا اور اچھا انتخاب یہ ہے کہ وہ ونائل کا انتخاب کریں۔
اچھے معیار کی ونائل کا ڈیزائن آپ کو قدرتی لکڑی کا احساس دیتا ہے۔ اور چونکہ ونائل، فلورنگ اور شیٹ، دونوں اقسام میں دستیاب ہے، تو اگر آپ چاہتے ہیں کہ آپ کے باورچی خانے میں استعمال ہونے والا فرش سرامک ٹائل جیسا نظر آئے تو آپ اس سے یہ کام بھی لے سکتے ہیں۔
ونائل پر چلنے سے آواز بھی پیدا نہیں ہوتی اور یہ لکڑی، سرامک ٹائل، کنکریٹ یا پتھر کے مقابلے میں قدرے نرم محسوس ہوتی ہے۔
