فرمان الہی
نماز کے اوقات
صدر مملکت آصف علی زرداری نے کہا ہے کہ جرات، نظم اور حکمت بھارت کے خلاف ہماری کامیابی کا باعث بنی ہے۔
صدر مملکت نے پاکستان کی 78ویں سالگرہ کے موقع پر پیغام دیا اور اہل وطن کو یوم آزادی پر مبارک باد دی۔
انہوں نے کہا کہ یہ دن ہمیں جرات، اتحاد اور قربانیوں کی یاد دلاتا ہے، آج ہم قائداعظم اور تحریک پاکستان کے تمام کارکنان کو خراجِ عقیدت پیش کرتے ہیں۔
آصف علی زرداری نے مزید کہا کہ اس سال ہم یومِ آزادی بڑے افتخار اور ایک تازہ اُمید کے ساتھ منا رہے ہیں، حال ہی میں قوم نے بیرونی جارحیت کے جواب میں اپنی طاقت، عزم اور اتحاد کا مظاہرہ کیا۔
ان کا یہ بھی کہنا تھا کہ معرکہ حق اور آپریشن بنیان مرصوص میں ہماری فتح تاریخ کا سنہرا باب ہے، معرکہ حق میں کامیابی غیر متزلزل عزم، بےمثال پیشہ ورانہ مہارت اور قومی اتحاد کا ثبوت ہے۔
صدر مملکت نے یہ بھی کہا کہ بھارت کی بلاجواز جارحیت کے جواب میں ہم نے تحمل، حکمت اور بھرپور قوت سے دفاع کیا، دنیا نے دیکھا، پاکستان امن چاہتا ہے مگر اپنی خودمختاری، سالمیت کے تحفظ کی مکمل صلاحیت رکھتا ہے۔
انہوں نے کہا کہ معرکہ حق میں فتح ہمارے عوام کے لیے نئے اعتماد کا ذریعہ بنی ہے، معرکہ حق میں کامیابی نے قوم کے حوصلے بلند کیے۔
آصف علی زرداری نے کہا کہ آپریشن بنیان مرصوص نے اداروں پر اعتماد مزید مضبوط کیا، پاکستان کا عالمی مقام مزید مستحکم کیا، آج دنیا پاکستان کو ایسے ملک کے طور پر دیکھتی ہے جو امن کا خواہاں ہے مگر دباؤ کے آگے نہیں جھکتا۔
اُن کا کہنا تھا کہ ہم متحد، یکسو اور مشترکہ مقصد کے لیے پرعزم ہوں تو ہر شعبے میں کامیابی حاصل کرسکتے ہیں، جذبے کو معاشی بحالی، تعلیمی اصلاحات، تکنیکی ترقی، اصلاحات اور ماحولیاتی تحفظ کی جانب لگانا ہوگا، نظم، جرات اورحکمت بھارت کے خلاف حالیہ کامیابی کا باعث بنی۔
