فرمان الہی
نماز کے اوقات
موسمیاتی تجزیہ کار جواد میمن نے کہا ہے کہ کراچی میں 3 سے 4 دنوں میں تیز بارشوں کا امکان ہے، شہر میں سمندری ہوا رکی ہوئی ہے، آج شام بھی کراچی میں درمیانی یا تیز بارش ہو سکتی ہے۔
جیو نیوز کے پروگرام جیو پاکستان میں گفتگو کرتے ہوئے انہوں نے کہا کہ کراچی میں شدید حبس محسوس کیا جا رہا ہے، حبس اور مرطوب موسم مون سون سسٹم کو تقویت دیتے ہیں۔
موسمیاتی تجزیہ کار نے کہا کہ 23 اگست تک جاری رہنے والے سسٹم کے دوران دو سے تین اسپیل آسکتے ہیں۔ اسپیل کے دوران شہر کے بیشتر مقامات پر 40 سے 50 ملی میٹر بارش ہوسکتی ہے جبکہ چند مقامات پر 70 سے 80 اور کہیں کہیں 100 ملی میٹر بارش کا امکان ہے۔
ان کا کہنا تھا کہ ایک اور ہوا کا کم دباؤ 25 اگست کے قریب خلیج بنگال میں بن سکتا ہے، اگست کے آخری دنوں میں بھی کراچی سمیت سندھ میں بارش کا امکان رہے گا۔
جواد میمن کا کہنا ہے کہ موسمیاتی تبدیلی کے اثرات کو ملک کے اکثر علاقوں میں محسوس کیا جا رہا ہے۔ کچھ حد تک بارش کی شدت کی پیش گوئی کی جاسکتی ہے، کلاؤڈ برسٹ اور آسمانی بجلی گرنے کی پیش گوئی کرنا ناممکن ہوتا ہے۔
انہوں نے کہا کہ شدید مون سون کی بارشوں کا سلسلہ 2022ء سے شروع ہوا، ہر گزرتے سال بارشوں، سردیوں اور گرمیوں کی شدت بڑھتی جا رہی ہے۔ گلگت اور کشمیر کے علاقوں میں درجۂ حرارت غیرمعمولی طور پر بڑھ رہا ہے۔ جس حساب سے جنگل ختم کیے جا رہے ہیں اسی لحاظ سے شجر کاری کرنے کی ضرورت ہے۔
