فرمان الہی
نماز کے اوقات
وفاقی وزیر اطلاعات عطا اللّٰہ تارڑ نے کہا ہے کہ ضمانت تو قاتل اور ڈکیت کی بھی ہوتی ہے، ضمانت کا مطلب بریت نہیں۔
اسلام آباد میں میڈیا سے گفتگو سے کرتے ہوئے عطا تارڑ نے کہا کہ کیسے ہوسکتا ہے حکومت پاکستان کو آنے والا پیسہ ایک جرمانے میں جمع کرایا جائے، انھوں نے پانچ پانچ قیراط کی انگھوٹھیاں لیں وہ کس مد میں لیتے رہے؟
وزیر اطلاعات نے کہا کہ کابینہ سے بند لفافے میں معاہدے کی منظوری لی گئی، بانی پی ٹی آئی نے کہا لفافے کے اندر کیا ہے یہ چھوڑیں بس منظوری دیں، 190ملین پاؤنڈ کیس میں یہ اپنے دفاع میں کچھ پیش نہ کرسکے۔
عطا تارڑ نے مزید کہا کہ اب ضمانت پر خوشیاں منار ہے، ضمانت تو قاتل اور ڈکیت کی بھی ہوتی ہے۔ ضمانت کا مطلب بریت نہیں، ٹرائل چل رہا ہے کیس کو منطقی انجام تک پہنچنا ہے، 9 مئی کے کیسز پوری قوم کے کیس ہیں، پوری قوم نے 9 مئی دیکھا، ایک ضمانت ملنے پر اتنا جشن سمجھ سے باہر ہے۔
وفاقی وزیر اطلاعات نے کہا کہ 9 مئی کے دیگر ملزمان بھی ضمانت پر باہر تھے، 9 مئی کے ماسٹر مائنڈ بانی پی ٹی آئی تھے، انہوں نے سازش کی تاکہ ان حالات کا فائدہ دشمن اٹھائے۔
وزیراطلاعات عطا تارڑ نے کہا ان کے پاس 9 مئی کے واقعات کا دفاع نہیں ہے، ضمانت پر خوشیاں منا کر یہ خود کو بیوقوف بنا رہے ہیں، قوم نے تحریک انصاف کے بیانیے کو رد کر دیا ہے، پی ٹی آئی اپنے طرز عمل پر غور کرے جھوٹی خوشی مناکر قوم کو بیوقوف نہیں بنایا جاسکتا۔
انھوں نے کہا 190ملین پاؤنڈ کیس میں بانی پی ٹی آئی کو 14 سال قید ہوئی، اس کا یہ آج تک جواب نہیں دے سکے، یہ 190ملین پاونڈ میں اتنے نیک نیت تھے تو القادر ٹرسٹ کیوں بنایا؟
انھوں نے کہا بانی پی ٹی آئی 190ملین پاونڈ کیس میں قید ہیں، ضمانت سے رہائی نہیں ملے گی، ان کو شاید نہیں پتہ کہ ضمانت اور بریت میں فرق ہوتا ہے، روز روشن کی طرح عیاں ہے کہ 9 مئی بانی پی ٹی آئی نے پلان کیا۔
عطا تارڑ نے کہا بانی پی ٹی آئی نے پورے ملک کو تباہ کرنے کی سازش کی، کسی دشمن نے جرات نہیں کی جس حد تک پی ٹی آئی چلی گئی، پراسیکیوشن کے پاس ناقابل تردید ثبوت ہیں، تحریک انصاف کے لیے سوگ کا دن ہے۔
وفاقی وزیر کا کہنا تھا انہوں نے آئی ایم ایف کو لیٹر لکھے، قوم کو بیوقوف بنانے کی کوشش کی، اب یہ اپنے آپ کو بیوقوف بنا رہے ہیں، تحریک انصاف نے جھوٹے بیانیے بنائے اور خود کو تسلی دے رہے ہیں۔
وفاقی وزیر اطلاعات نے کہا ان کے خلاف ناقابل تردید ثبوتوں کا پلندہ ہے، جھوٹی خوشی منانے کے لیے قوم کو بے وقوف نہیں بنایاجاسکتا۔
