فرمان الہی
نماز کے اوقات
چینی وزارتِ خارجہ کے ترجمان کا کہنا ہے کہ چین ہمیشہ پاکستان کا سب سے زیادہ قابلِ بھروسہ شراکت دار اور مضبوط سپورٹر رہا ہے۔
یہ بات ترجمان چینی وزارتِ خارجہ نے وزیرِ اعظم شہباز شریف سے چینی وزیرِ خارجہ وانگ ای کی ملاقات کے حوالے سے جاری کیے گئے بیان میں کہی ہے۔
چینی وزارتِ خارجہ کے ترجمان نے یہ بھی کہا ہے کہ عالمی منظر نامہ جو بھی رہا ہو پاک چین دوستی ہمیشہ مضبوط اور مستحکم رہی ہے۔
واضح رہے کہ گزشتہ روز وزیرِاعظم شہباز شریف نے چین کے وزیرِ خارجہ وانگ ای سے وزیرِاعظم ہاؤس میں ملاقات کی، ملاقات میں آرمی چیف فیلڈ مارشل عاصم منیر، ڈپٹی وزیرِ اعظم اسحاق ڈار، کابینہ کے سینئر ارکان بھی موجود تھے۔
وزیرِاعظم شہباز شریف نے چینی وزیرِ خارجہ سے گفتگو کرتے ہوئے کہا کہ چین کے ساتھ اسٹریٹیجک تعاون پر مبنی شراکت داری مزید مضبوط کریں گے، پاکستان کی خود مختاری اور قومی ترقی میں چین کے کردار کو سراہتے ہیں۔
وزیرِاعظم نے پاکستان کی خودمختاری و علاقائی سالمیت پر حمایت پر چینی حکومت کا شکریہ ادا کیا اور چینی صدر شی جن پنگ کی قیادت کو خراجِ تحسین پیش کیا۔
انہوں نے کہا کہ آئندہ دورۂ بیجنگ اور تیانجن کا شدت سے منتظر ہوں، دورے میں ایس سی او سربراہی اجلاس اور جنگ عظیم دوم کی 80 ویں سالگرہ کی تقریبات میں شرکت کروں گا۔
وزیرِاعظم شہباز شریف نے کہا کہ پاکستان تجارت، سرمایہ کاری، آئی سی ٹی، زراعت اور معدنیات میں چین سے تعاون بڑھانا چاہتا ہے، سی پیک پاکستان کی سماجی و معاشی ترقی اور خطے کی کنیکٹیوٹی کے لیے کلیدی اہمیت رکھتا ہے۔
اس موقع پر چینی وزیرِ خارجہ وانگ ای نے کہا کہ پاکستان ہمارا آہنی دوست اور ہر موسم کا اسٹریٹیجک پارٹنر ہے، چین پاکستان کی خودمختاری اور علاقائی سالمیت کے دفاع کے عزم کو سراہتا ہے۔
انہوں نے یہ بھی کہا کہ چین پاکستان سے مل کر علاقائی امن، ترقی اور استحکام کے لیے کام کرتا رہے گا۔
وزیرِ اعظم آفس کے مطابق ملاقات میں وزیرِ اعظم شہباز شریف نے سی پیک فیز ٹو کی مسلسل پیش رفت پر اطمینان کا اظہار بھی کیا۔
اس سے قبل چینی وزیر خارجہ نے صدر مملکت آصف علی زرداری سے بھی ملاقات کی۔
اس موقع پر صدر زرداری نے کہا کہ سی پیک پاک چین مشترکہ وژن کی تکمیل کا اہم ذریعہ ہے۔
چینی وزیر خارجہ نے کہا کہ پاک چین دوستی نسل در نسل قائم ہے۔
