فرمان الہی
نماز کے اوقات
وزیرخارجہ اسحاق ڈار 25 تا 26 اگست سعودی عرب کا سرکاری دورہ کریں گے۔
ترجمان دفترِ خارجہ کے مطابق اسحاق ڈار جدہ میں اوآئی سی وزرائے خارجہ کونسل اجلاس میں شریک ہوں گے۔
ترجمان دفترِ خارجہ کا کہنا ہے کہ 2 روزہ دورۂ بنگلادیش کے بعد نائب وزیرِاعظم براہِ راست جدہ روانہ ہوں گے۔
اجلاس میں او آئی سی رکن ممالک کے وزرائے خارجہ، اعلیٰ حکام شرکت کریں گے، جس میں فلسطین کی صورتحال، اسرائیلی جارحیت پر غور کیا جائے گا۔
دفتر خارجہ کا کہنا ہے کہ پاکستان ہمیشہ فلسطینی عوام کے حق میں آواز بلند کرتا اور عالمی فورمز پر اس مسئلے کو اجاگر کرتا رہا ہے، ہنگامی اجلاس میں نائب وزیرِاعظم پاکستان کے اصولی مؤقف کو دہرائیں گے۔
ترجمان کا کہنا ہے کہ اسحاق ڈار فلسطین کے لیے پاکستان کی غیر متزلزل حمایت کا اعادہ کریں گے، اسرائیل کے تمام مقبوضہ فلسطینی علاقوں سے مکمل انخلاء پر زور دیں گے، غزہ پر مکمل فوجی کنٹرول اور فلسطینیوں کی جبری بے دخلی کی شدید مخالفت کریں گے۔
اسحاق ڈار انسانی ہمدردی کی بنیاد پر امداد کی بلا تعطل فراہمی کی فوری ضرورت کے لیے دباؤ ڈالیں گے، فلسطینی عوام کے جائز حقوق کی بحالی کا مطالبہ کریں گے۔
نائب وزیرِاعظم کی او آئی سی کے اہم رکن ممالک کے وزرائے خارجہ سے دو طرفہ ملاقاتیں بھی متوقع ہیں۔
