فرمان الہی
نماز کے اوقات
چینی وزیرِ خارجہ وانگ ای نے کہا ہے کہ پاکستانی فوج قومی استحکام کا ستون، پاک چین دوستی اور تعاون کی مضبوط محافظ ہے۔
چینی وزیرِخارجہ وانگ ای کی چیف آف آرمی اسٹاف، فیلڈ مارشل سید عاصم منیر سے ملاقات پر چین کی وزارت خارجہ نے بیان جاری کیا ہے۔
جاری بیان کے مطابق چینی وزیرِ خارجہ وانگ ای نے کہا ہے کہ چین عالمی امور میں پاکستان کے بڑے کردار کا خیر مقدم کرتا ہے، پاک چین اسٹریٹجک شراکت داری چٹان کی طرح مضبوط ہے، پاکستانی فوج نے ہمیشہ دونوں ممالک کی قیادت کے درمیان طے پانے والے اہم اتفاقِ رائے پر عمل درآمد کی بھرپور حمایت کی ہے۔
انہوں نے کہا کہ چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے، وقت کے کڑے امتحانات کے باوجود پاک چین تعلقات مزید مضبوط ہوئے ہیں، دونوں ممالک ایک مضبوط روایتی دوستی قائم کر چکے ہیں۔
چینی وزیرِ خارجہ نے کہا ہے کہ دنیا میں پیدا ہوتے غیر یقینی حالات میں مضبوط پاک چین تعلقات کو فروغ دینا علاقائی امن و استحکام کے لیے سود مند ہے۔
چینی وزارتِ خارجہ کے مطابق فیلڈ مارشل سید عاصم منیر نے کہا ہے کہ چین پاکستان کا ’آہنی دوست‘ ہے، دونوں ممالک ہمیشہ ایک دوسرے کے دکھ سکھ میں شریک رہے ہیں، پاک چین اسٹریٹجک شراکت داری چٹان کی طرح مضبوط ہے۔
سید عاصم منیر نے کہا ہے کہ چین کے ساتھ دوستانہ تعلقات قائم رکھنا پورے پاکستانی قوم کا متفقہ مؤقف ہے۔
فیلڈ مارشل نے پاکستان کی معاشی اور سماجی ترقی میں قیمتی تعاون پر چین کی قیادت سے اظہارِ تشکر بھی کیا۔
انہوں نے کہا کہ پاکستانی فوج انسدادِ دہشت گردی اور سیکیورٹی تعاون کو فعال طور پر فروغ دینے کے لیے تیار ہے، پاکستان میں چینی اہلکاروں، منصوبوں اور اداروں کی حفاظت یقینی بنانے کی کوشش جاری رہے گی۔
فیلڈ مارشل نے یہ بھی کہا کہ پاک چین دوستی کو مزید مستحکم بنانے کے لیے اقدامات اور ترقی کی راہ پر سفر جاری رکھا جائے گا۔
