فرمان الہی
نماز کے اوقات
ڈائریکٹر امیگریشن ایف آئی اے کی منظوری سے سعید غنی کے بھائی ٹاؤن چیئرمین فرحان غنی کا نام اسٹاپ لسٹ سے نکال دیا گیا۔
ایف آئی اے ذرائع کے مطابق مسافر فرحان غنی کو کلیئر کرنے کے بعد جدہ جانے کی اجازت دے دی گئی۔
واضح رہے کہ ٹاؤن چیئرمین فرحان غنی کا نام اسٹاپ لسٹ میں شامل ہونے پر انہیں ایئرپورٹ پر روک لیا گیا تھا۔
یاد رہے کہ سعید غنی کے بھائی ٹاؤن چیئرمین فرحان غنی و دیگر ملزمان سرکاری ملازمین پر تشدد اور دھمکانے کے کیس میں کراچی کی انسداد دہشت گردی عدالت میں پیش ہوئے تھے۔ عدالت نے فرحان غنی کو عمرے پر جانے کی اجازت دی تھی۔
دوران سماعت وکیل صفائی نے کہا تھا کہ میرے موکل کو عمرے کی ادائیگی کے لیے جانا ہے۔ عدالت نے ملزم سے استفسار کیا کہ آپ کب جا رہے ہیں اور کب واپس آئیں گے؟
فرحان غنی نے عدالت کو بتایا تھا کہ میں کل صبح جا رہا ہوں اور 19 ستمبر کی واپسی ہے۔
عدالت نے پھر استفسار کیا کہ آپ کی ٹکٹ کنفرم ہیں؟ ٹاؤن چیئرمین فرحان غنی نے کہا کہ جی میری ٹکٹ کنفرم ہیں۔ عدالت نے کہا کہ تو پھر آئندہ سماعت 20 ستمبر کو رکھ لیتے ہیں۔ فرحان غنی نے کہا کہ میری گزارش ہے سماعت پیر 22 ستمبر کو کی جائے، جس پر عدالت نے کہا کہ چلیں ٹھیک ہے، پیر کو رکھ لیتے ہیں۔
