فرمان الہی
نماز کے اوقات
وزیرِ اعظم شہباز شریف نے کہا ہے کہ پاک بحریہ ملک کی محافظ اور ہمارے تابناک مستقبل کی معمار ہے۔
یومِ بحریہ 8 ستمبر 2025ء کے موقع پر پیغام میں وزیرِ اعظم شہباز شریف نے کہا ہے کہ یومِ بحریہ پر پاک بحریہ کے جوانوں، افسران اور اہلکاروں کو خراجِ تحسین پیش کرتا ہوں۔
انہوں نے کہا کہ پاک بحریہ کی پیشہ ورانہ فرائض کی ادائیگی نے ہمیشہ قوم کا سر فخر سے بلند کیا ہے، یہ ملک کی آبی سرحدوں اور آبی مفادات کے تحفظ کا اعادہ کرنے کا دن ہے۔
شہباز شریف نے کہا ہے کہ پاک بحریہ کی تاریخ بہادری کی داستانوں سے بھرپور ہے، 1965ء کی جنگ میں آپریشن سومناتھ ایک یادگار حیثیت رکھتا ہے۔
اُن کا کہنا ہے کہ پاک بحریہ نے بھارتی ساحلی شہر دوارکا پر حملہ کر کے مواصلاتی نظام تباہ کیا، اس تاریخی معرکے کی فتح آج بھی جوانوں کے دفاعِ وطن کا جذبہ تازہ کرتی ہے۔
وزیرِ اعظم نے کہا کہ پاکستان کی آبی سرحدوں کی حفاظت پاک بحریہ کی مستعد نگرانی میں ہے، بحیرۂ عرب میں طاقت کا توازن قائم رکھنے میں پاک بحریہ کا کلیدی کردار ہے۔
انہوں نے کہا کہ معرکۂ حق میں پاک بحریہ نے کامیابی سے اپنی تیاری اور عزم کا عملی ثبوت دیا، پاک بحریہ ملک کی محافظ اور ہمارے تابناک مستقبل کی معمار ہے۔
شہباز شریف نے کہا کہ پاک بحریہ بلیو اکانومی، بندرگاہوں کی تعمیر و ترقی میں بھرپور کردار ادا کر رہی ہے، آج یومِ بحریہ پر ہم پاک بحریہ کے ماضی اور موجودہ ہیروز کو سلام پیش کرتے ہیں۔
اُن کا کہنا ہے کہ اللّٰہ تعالیٰ پاک بحریہ، مسلح افواج اور پاک وطن کو ترقی، خوش حالی اور کامیابی سے ہم کنار کریں، پاک بحریہ زندہ باد، پاکستان پائندہ باد۔
