فرمان الہی
نماز کے اوقات
صوبائی ڈیزاسٹر مینجمنٹ اتھارٹی (پی ڈی ایم اے) کے ڈائریکٹر جنرل عرفان علی کاٹھیا نے کہا ہے کہ بھارت صرف اپنی ضرورت کے مطابق اپنی ڈاؤن اسٹریم نہروں میں پانی چھوڑ رہا ہے، بھارت سے راوی اور ستلج میں پانی چھوڑنے کا سلسلہ رُک چکا ہے۔
جیونیوز کے پروگرام ’جیو پاکستان‘ میں گفتگو کے دوران عرفان علی کاٹھیا نے کہا کہ جلالپور پیر والا کی صورتحال انتہائی خراب ہے، جلالپور پیروالا کو تین دریاؤں کا پانی متاثر کر رہا ہے۔ دریائے راوی، چناب اور ستلج بھی جلالپور پیروالا کو متاثر کر رہا ہے۔
عرفان علی کاٹھیا کا کہنا تھا کہ چند گھنٹے پہلے ایک شگاف پڑنے سے پانچ چھ مزید آبادیاں متاثر ہونے کا خدشہ ہے، تمام لوگوں کے انخلا کو یقینی بنایا جا رہا ہے، وزیرِ اعلی پنجاب مریم نواز آج جلال پور پیروالا کا دورہ کریں گی۔
انہوں نے مزید کہا کہ 175 سے زائد ریسکیو کی بوٹس جلال پور پیروالا میں کام کر رہی ہیں، لوگوں نے انخلا سے گریز کیا، جو ہمارے لیے ایک چیلنج بنا ہے، شگاف پُر کرنے کے لیے تمام مشینری کام کر رہی ہے۔
ڈی جی پی ڈی ایم اے پنجاب نے بتایا ہے کہ پاک آرمی ایک ہفتہ سے ریسکیو کے ساتھ جلالپور پیروالا میں موجود ہے۔
ان کا کہنا تھا کہ نارووال، شیخوپورہ، لاہور، ننکانہ میں پانی کے بہاؤ میں بتدریج کمی آ رہی ہے، سیالکوٹ، گوجرانوالہ، وزیرآباد، حافظ آباد، چنیوٹ میں کافی تیزی سے پانی اتر رہا ہے۔
عرفان علی کاٹھیا نے یہ بھی کہا کہ پانی اترنے والے علاقوں میں ریلیف کیمپوں سے لوگ واپس جا رہے ہیں، اگلے تین دن کا بڑا چیلنج ساؤتھ پنجاب ہے، ملتان کی صورتحال تشویشناک ہے، مظفرگڑھ، لیاقت پور اور رحیم یارخان کی صورتحال تشویشناک ہوگی۔
