فرمان الہی
نماز کے اوقات
وزیراعظم شہباز شریف دورہ سعودی عرب مکمل کر کے ریاض سے لندن روانہ ہو گئے۔
ریاض کے نائب گورنر محمد بن عبد الرحمان بن عبد العزیز نے ایئرپورٹ پر وزیراعظم کو الوداع کیا۔
قریبی ذرائع کے مطابق وزیراعظم شہباز شریف جنیوا میں سابق وزیراعظم نواز شریف کی عیادت کریں گے، وہ نواز شریف کی عیادت کے لیے تقریباً 2 گھنٹے جنیوا میں قیام کریں گے۔
نواز شریف ان دنوں علاج کے لیے جنیوا میں قیام پذیر ہیں، نواز شریف کا آئندہ چند روز میں لندن آنے کا امکان ہے۔
وزیراعظم نے آج اپنا 2 روزہ دورہ سعودی عرب مکمل کرلیا ہے اور اب وہ برطانیہ کے دورے کے لیے روانہ ہوگئے ہیں۔
وزیراعظم شہباز شریف ہفتے کو مسلم لیگ ن برطانیہ کے زیر اہتمام لندن میں پاکستانی کمیونٹی کے کنونشن سے خطاب کریں گے۔
شہباز شریف لندن میں قیام کے دوران برطانوی حکام کےعلاوہ پاکستانی بزنس و کمیونٹی قیادت سے بھی ملاقاتیں کریں گے۔
وزیراعظم شہباز شریف دورۂ برطانیہ کے بعد امریکا بھی جائیں گے جہاں وہ نیویارک میں اقوام متحدہ کی جنرل اسمبلی کے اجلاس میں شرکت کریں گے۔
واضح رہے کہ گزشتہ شب سعودی ولی عہد اور وزیرِ اعظم شہباز شریف نے پاکستان اور سعودی عرب کے مابین اسٹریٹجک باہمی دفاعی معاہدے (SMDA) پر دستخط کیے ہیں۔
مذکورہ معاہدہ دونوں ممالک کی سلامتی کو بڑھانے، خطے اور دنیا میں امن کے حصول کے مشترکہ عزم کی عکاسی کرتا ہے، موجودہ اور متوقع خطرات و چیلنجز کے تناظر میں یہ معاہدہ دفاع کو مضبوط بنائے گا۔
معاہدہ دونوں ممالک کی دفاعی صلاحیتوں کی تیاری اور انضمام کو بڑھائے گا، معاہدے سے دونوں ممالک کی سلامتی اور علاقائی سالمیت کو لاحق کسی بھی خطرے کا مقابلہ کیا جا سکے گا۔
معاہدے کی شقوں کے تحت کسی بھی ملک پر بیرونی مسلح حملہ دونوں ممالک پر حملہ تصور ہو گا۔
