فرمان الہی
نماز کے اوقات
سنچری کے بعد پاکستانی کرکٹر سدرہ امین کے ’6‘ کے اشارے نے بھارت میں ہنگامہ برپا کردیا، بھارتی شائقین نے اس کو طیاروں کی شکست سے جوڑ دیا۔
پاکستان ویمن ٹیم کی بیٹر سدرہ امین نے جنوبی افریقہ کے خلاف تین میچوں کی سیریز کے دوسرے میچ میں مسلسل دوسری سنچری بنا کر نیا قومی ریکارڈ قائم کیا۔
سدرہ امین نے اپنی چھٹی سنچری مکمل کرنے کے بعد جب ’6‘ کا اشارہ کیا تو بھارتی سوشل میڈیا صارفین آپے سے باہر ہوگئے اور اسے مئی کے فضائی معرکے میں اپنے 6 طیارے گرنے کے واقعے سے جوڑ کر شور مچانے لگے۔
بھارتی صارفین نے الزام لگایا کہ سدرہ کھیل میں سیاست کو شامل کر رہی ہیں۔
تاہم حقیقت یہ تھی کہ سدرہ امین صرف اپنی چھٹی سنچری کا جشن منارہی تھیں، جس کے بعد بھارتیوں کو معرکہ حق میں پاک فضائیہ کی جانب سے گرائے گئے اپنے 6 طیارے یاد آگئے اور انہوں نے سوشل میڈیا پر طوفان اٹھادیا۔
واضح رہے کہ سدرہ امین نے پہلے ون ڈے میں 121 اور دوسرے میں 122 رنز اسکور کیے، اس طرح وہ لگاتار دو ون ڈے سنچریاں بنانے والی پہلی پاکستانی اور دوسری ایشیائی ویمن کرکٹر بن گئیں۔
اب تک پاکستان ویمنز ٹیم کی جانب سے کُل 10 سنچریاں اسکور کی جا چکی ہیں جس میں سے 6 کا کریڈٹ اکیلی سدرہ امین کو جاتا ہے۔
