فرمان الہی
نماز کے اوقات
بالی ووڈ اداکارہ امریتا راؤ کو 2006ء کی فلم ’ویواہ‘ کی شاندار کامیابی کے بعد شادی کی بے شمار پیشکشیں ملیں۔
بھارتی میڈیا کے مطابق امریتا راؤ نے حال ہی میں رنویر الہٰ آبادیہ سے گفتگو میں بتایا ہے کہ وہ کس طرح فلمی دباؤ اور تنہائی کا شکار ہوئیں، حتیٰ کہ شادی سے پہلے وہ شدید جذباتی مشکلات سے گزر رہی تھیں جس کے بعد انہوں نے آر جے انمول سے شادی کی۔
فلم ’ویواہ‘ کی زبردست کامیابی کے بعد امریتا راؤ ایک گھریلو خاتون بن کر رہ گئی تھیں، انہیں ان کی سادگی، معصومیت اور آن اسکرین خوبصورتی کے لیے سراہا گیا، تاہم ان کی زندگی ایسے دوراہے سے بھری ہوئی تھی جس کے باعث انہوں نے خود کو جذباتی طور پر تنہا اور تخلیقی طور پر دبا ہوا محسوس کیا۔
رنویر الہٰ آبادیہ کے ساتھ گفتگو میں امریتا نے بتایا کہ فلم ویواہ کے بعد میرے لیے این آر آئی رشتے آنے لگے، لوگ فیملی فوٹوز کے ساتھ اپنی کار اور کتے کے پاس کھڑے ہو کر لکھتے کہ ’مجھ سے شادی کر لو‘ اور یہ صرف ایک یا دو نہیں، بہت سارے تھے، میں ہنستی اور سوچتی کہ یہ کیسے لوگ ہیں، کچھ لوگوں نے خطوط بھی بھیجے، حتیٰ کہ ایک بار مجھے خون سے لکھا ہوا خط بھی ملا جو بہت خوفناک تھا، ایک لڑکا تو میرے گھر کے باہر ٹیلیفون بوتھ پر ہی کھڑا رہتا تھا اور پھر میری والدہ یا والد کو اس کا فون اٹھانا پڑتا، یہ سب کچھ بہت زیادہ ہو گیا تھا۔
امریتا راؤ نے بتایا کہ میں اپنے شوہر آر جے انمول سے اس وقت ملی جب میں اپنی زندگی کے ایک بہت اہم موڑ پر تھی، اس دوران میں اندرونی جنگ اور کیریئر کے ایک نازک مرحلے سے بھی گزر رہی تھی، کئی سپر ہٹ فلموں کا حصہ ہونے اور ناظرین سے حقیقی تعریف حاصل کرنے کے باوجود میں تخلیقی طور پر جمود کا شکار ہو گئی تھی، میں جو فلمیں میں کرنا چاہتی تھی وہ مجھے مل نہیں رہی تھیں، بڑی آفرز آتیں مگر لوگ میری حوصلہ شکنی کرنے کے لیے طرح طرح کی باتیں کہتے تھے اور میں سوچتی کہ میرے پاس ہمیشہ اس طرح کی خامی والی آفرز ہی کیوں آتی ہیں؟ اس دوران میں نہ پارٹیز میں جانا چاہتی تھی، نہ ایوارڈ شوز میں اور نہ کہیں اور دکھائی دینا چاہتی تھی، بس کام کرتی اور گھر آتی تھی، میں بہت اکیلا پن محسوس کرتی تھی۔
انہوں نے بتایا کہ اسی مشکل مرحلے کے دوران میں آر جے انمول سے ملی جو بعد میں میرے جیون ساتھی بن گئے، ان کے رشتے نے مجھے مضبوط بنایا اور مجھے جذباتی اور پیشہ ورانہ افراتفری سے نمٹنے میں مدد کی۔
7 سال تک ڈیٹنگ کے بعد امریتا راؤ نے 15 مئی 2016ء کو ممبئی میں ایک نجی تقریب میں انمول سود سے شادی کی، اس جوڑے نے یکم نومبر 2020ء کو اپنے بیٹے ویر کا استقبال کیا۔
2019ء کی فلم ٹھاکرے سے مین اسٹریم سنیما سے وقفے کے بعد امریتا راؤ کی فلم ’جولی ایل ایل بی 3‘ کے ساتھ قابلِ ذکر واپسی ہوئی ہے، جو اس فرنچائز کی تیسری قسط ہے۔
امریتا نے 2013ء کی اس سلسلے کی پہلی فلم جولی ایل ایل بی کی طرح ارشد وارثی کی بیوی سندھیا کا کردار دوبارہ اس نئی فلم میں نبھایا ہے۔
