فرمان الہی
نماز کے اوقات
بالی ووڈ کے معروف اداکار گووندا کو بے ہوشی کی حالت میں اسپتال منتقل کردیا گیا۔
بالی ووڈ کے معروف اداکار گووندا کو گزشتہ رات گھر میں اچانک بے ہوش ہونے کے بعد ممبئی کے علاقے جوہو میں واقع کرٹی کیئر اسپتال میں داخل کروایا گیا ہے۔
بھارتی میڈیا کے مطابق 61 سالہ اداکار گزشتہ شب طبی پیچیدگیوں اور ذہنی تناؤ کے باعث ہوش و حواس کھو بیٹھے تھے، جس کے بعد انہیں فوری طور پر اسپتال منتقل کیا گیا تھا۔
گووندا کے قریبی دوست اور قانونی مشیر بندل نے بھارتی میڈیا سے گفتگو میں تصدیق کی کہ اداکار کو رات گئے تقریباً ایک بجے ایمرجنسی میں اسپتال لایا گیا تھا، گھر پر پہلے ڈاکٹر سے فون پر مشورہ کیا گیا اور دوا دی گئی، لیکن حالت سنبھل نہ سکی تو اسپتال منتقل کرنا پڑا۔
ان کا کہنا تھا کہ گووندا کے متعدد ٹیسٹ کیے گئے ہیں اور اب ان کی رپورٹس کا انتظار ہے۔
یاد رہے کہ گزشتہ سال اکتوبر میں بھی گووندا ایک حادثے کا شکار ہوئے تھے جب ان کی لائسنس یافتہ پستول غلطی سے چل گئی تھی اور ان کی ٹانگ میں گولی لگ گئی تھی، جس کے بعد ان کو اسپتال میں داخل کیا گیا تھا، جہاں ایک گھنٹے کے آپریشن کے بعد ان کی ٹانگ سے گولی نکالی گئی تھی۔
