فرمان الہی
نماز کے اوقات
بانی چیئرمین پاکستان تحریک انصاف (پی ٹی آئی) کی ہمشیرہ عظمیٰ خان نے کہا ہے کہ عمران خان کی صحت بالکل ٹھیک ہے۔
عظمیٰ خان کی ملاقات کے بعد افغانستان اور بھارت کے میڈیا کا بانی چیئرمین کی صحت سے متعلق پروپیگنڈا جھوٹا ثابت ہوگیا ہے۔
اڈیالہ جیل کی انتظامیہ نے عظمیٰ خان کا بانی پی ٹی آئی اور اُن کی اہلیہ بشریٰ بی بی سے ملنے دیا لیکن علیمہ خان اور نورین نیازی کو ملاقات کی اجازت نہیں دی۔
پی ٹی آئی کا کوئی اور رہنما بھی بانی چیئرمین سے ملاقات کی اجازت حاصل نہیں کرسکا۔
4 ہفتے بعد ہونے والی ملاقات کے بعد جیل سے باہر آکر عظمیٰ خان نے میڈیا کے سوال پر بتایا کہ الحمد للّٰہ بانی پی ٹی آئی صحت مند ہیں، البتہ غصے میں ہیں، انہیں قید تنہائی میں رکھا جارہا ہے، اُن کی کسی سے کمیونیکیشن نہیں ہے۔
انہوں نے مزید کہا کہ بشریٰ بی بی کو بھی قید تنہائی میں رکھا گیا ہے، بار کونسلوں کے انتخابات کےلیے حامد خان اور سلمان اکرم راجا امیدوار چنیں گے۔
عظمیٰ خان نے یہ بھی کہا کہ پارٹی کےلیے ہدایت ہے کہ پارلیمنٹ اور سینیٹ میں احتجاج کریں، وزیراعلیٰ خیبر پختونخوا کو مکمل سپورٹ حاصل ہے۔
اُن کا کہنا تھا کہ دوران ملاقات بانی پی ٹی آئی نے این ڈی یو تقریب میں پارٹی لیڈروں کی شرکت پر مایوسی کا اظہار کیا ہے۔
اسلام آباد ہائیکورٹ کے سامنے احتجاج کے بعد پی ٹی آئی کے اراکین پارلیمنٹ اڈیالہ جیل کےلیے روانہ ہوئے تھے، سہیل آفریدی جیل نہیں پہنچے۔
پی ٹی آئی کے احتجاج کے پیش نظر راولپنڈی اور اسلام آباد میں دفعہ 144 کے تحت ہر قسم کے احتجاج اور جلسے، جلوس پر پابندی عائد رہی۔
دوسری طرف شام کے وقت صوابی انٹر چینج پر پی ٹی آئی کارکنوں نے احتجاج کیا، ٹائر جلا کر موٹر وے پر ٹریفک معطل کردی۔
گاڑیوں کی طویل قطاریں لگنے سے مسافروں کو شدید مشکلات کا سامنا کرنا پڑا، عظمیٰ خان کی بانی پی ٹی آئی سے ملاقات کے بعد پی ٹی آئی نے یہ احتجاج ختم کردیا، موٹر وے پر ٹریفک بحال ہوگئی۔
آج علیمہ خان نے فیکٹری ناکے پر میڈیا سے گفتگو میں کہا تھا کہ بانی پی ٹی آئی کو ایک ماہ سے قید تنہائی میں رکھا گیا ہے، یہ بانی پی ٹی آئی سے ان کی فیملی کی ملاقات سے خوفزدہ ہیں۔
انہوں نے کہا تھا کہ بھائی سے ملنے کا ہمارا قانونی اور آئینی حق ہے، جب تک ملاقات نہیں کروائیں گے ہم انتظار کرتے رہیں گے۔
گزشتہ روز جیو نیوز کے پروگرام کیپٹل ٹاک میں گفتگو کے دوران پی ٹی آئی کے رکن قومی اسمبلی شاہد خٹک نے کہا تھا کہ اگر وفاقی حکومت چاہتی ہے کہ کل کوئی مظاہرہ نہ ہو، کوئی دھرنا نہ ہو تو شام 4 بجے تک بانی پی ٹی آئی سے ملاقات کروا دے۔
انہوں نے یہ بھی کہا تھا کہ بانی پی ٹی آئی اور ان کی اہلیہ کو آئیسولیشن میں رکھا ہوا ہے۔
