فرمان الہی
نماز کے اوقات
کراچی (اسٹاف رپورٹر)سندھ کے سینئر وزیر و صوبائی وزیر ٹرانسپورٹ شرجیل انعام میمن نے خواتین کے لئے مخصوص ای وی اسکوٹیز کی تقسیم کا دوسرا مرحلہ فوری شروع کرنے کا حکم دیتے ہوئے کہا ہے کہ نئی الیکٹرک بسیں کراچی پہنچ گئی ہیں۔ وہ بدھ کو یہاں اپنے دفتر میں محکمہ ٹرانسپورٹ و ماس ٹرانزٹ کے اہم اجلاس کی صدارت کررہے تھے، جس میں سیکریٹری ٹرانسپورٹ اسد ضامن، سندھ ماس ٹرانزٹ اتھارٹی کی منیجنگ ڈائریکٹر (ایم ڈی) کنول نظام بھٹو اور دیگر حکام نے شرکت کی۔ اجلاس میں صوبے بھر میں جاری اور آئندہ شروع ہونے والے ٹرانسپورٹ اور موبیلیٹی منصوبوں پر تفصیلی تبادلہ خیال کیا گیا۔سینئر وزیر نے کہا کہ پنک اسکوٹیز اسکیم کے تحت بڑی تعداد میں خواتین کو جدید اور ماحول دوست سفری سہولت فراہم کی جائے گی، اس سہولت سے خواتین کی آمد و رفت میں آسانی اور خودمختاری کو فروغ ملے گا، نئی الیکٹرک بسیں کراچی پہنچ چکی ہیں، جو جلد شہر کے مختلف روٹس پر چلائی جائیں گی، خیرپور، شکارپور اور حیدرآباد کے 4نئے روٹس پر سروے مکمل کر لیا گیا ہے، جن پر جلد بسیں چلائی جائیں گی، تمام نئے روٹس رواں ماہ ہی فعال کر دیئے جائیں گے۔
