فرمان الہی
نماز کے اوقات
پاکستان پیپلز پارٹی (پی پی پی) کے چیئرمین بلاول بھٹو کا کہنا ہے فیض حمید کی سزا کا فیصلہ تاریخی ہے، یہ پیغام ہے کہ آئندہ ایسی غلطیاں نہ کی جائیں، بانیٔ پی ٹی آئی اور فیض حمید اپنے وقت کے فرعون تھے۔
چنیوٹ میں میڈیا سے گفتگو میں انہوں نے کہا کہ فیض حمید کے خلاف مزید تحقیقات اور ٹرائل ابھی باقی ہے، وہ طاقت کے نشے میں اپنے حلف کی خلاف ورزی کرتے رہے۔
بلاول بھٹو نے کہا کہ بانیٔ پی ٹی آئی اپنے دور میں ہر کسی کو جیل بھیجنا چاہتے تھے، آج وہ خود جیل میں ہیں اور یہ مکافاتِ عمل ہے۔
ان کا کہنا ہے کہ بانیٔ پی ٹی آئی طاقت کے نشے میں دھمکیاں دیتے تھے، وہ آج مکافاتِ عمل سے گزر رہے ہیں، انہیں اسی زندگی میں اپنے جرائم کا جواب دینا پڑ رہا ہے، بانی پی ٹی آئی اور جنرل فیض اپنے دورکے فرعون تھے۔
پی پی پی چیئرمین نے یہ بھی کہا کہ خیبر پختون خوا میں گورنر راج کا آپشن ضرور موجو دہے، وہاں گورنر راج کے حوالے سے پیپلز پارٹی اور ن لیگ کے درمیان کوئی بات چیت نہیں ہوئی، ہم نے آئینی عدالت بنانے کا وعدہ پورا کیا ہے۔
انہوں نے کہا کہ ایف بی آر کی کوتاہیوں کا بوجھ کسی صوبے کی عوام کو نہیں اٹھانا چاہیے، معاشی صورتحال کی وجہ سے عوام پریشان ہیں، حکومت نے کسی حد تک معاشی صورتحال بہتر کی ہے، ہمیں پتا ہے کہ وفاقی حکومت کو مشکلات ہیں، غیر ملکی سرمایہ کاری سے زیادہ ہمیں ایکسپورٹ پر توجہ دینی چاہیے، معاشی مشکلات کے ذمہ دار اسلام آباد میں بیٹھے بیورو کریٹس ہیں، سندھ میں ہم نےکسانوں کو سپورٹ کرنے کی کوشش کی ہے، زرعی شعبہ میں ترقی سے ایکسپورٹ میں اضافہ کر سکتے ہیں۔
واضح رہے کہ آرمی ایکٹ کے تحت فیلڈ جنرل کورٹ مارشل میں سابق لیفٹیننٹ جنرل فیض حمید کو 14 سال قید بامشقت کی سزا سنا دی گئی ہے، سزا کا اطلاق 11 دسمبر 2025ء سے شروع ہو گا۔
