فرمان الہی
نماز کے اوقات
وزیراعظم شہباز شریف نے کہا ہے کہ سانحہ آرمی پبلک اسکول پشاور کے شہداء کو خراجِ عقیدت پیش کرتا ہوں، اے پی ایس کے شہداء نے وطن کے مستقبل کے لیے اپنی جانوں کا نذرانہ پیش کیا۔
اس حوالے سے اپنے بیان میں انہوں نے کہا کہ دلخراش اے پی ایس سانحہ قوم کے لیے آزمائش تھا، اس سانحے نے ہمارے دلوں کو غم سے بھر دیا مگر حوصلے پست نہ کرسکا۔
وزیراعظم نے کہا ہے کہ پاکستان سے دہشت گردی کا خاتمہ ہی اس سانحے کا حقیقی انصاف ہے، قوم شہداء کے اہلخانہ کے غم میں برابر کی شریک ہے۔
شہباز شریف کا کہنا ہے کہ آج پاکستان ایک بار پھر دہشت گردی کے ناسور کا سامنا کر رہا ہے، ملک کے مختلف حصوں میں سیکیورٹی اہلکاروں اور معصوم شہریوں کو نشانہ بنایا جارہا ہے۔
ان کا کہنا ہے کہ ریاست، سیکیورٹی ادارے اور عوام متحد ہو کر دہشت گردی اور انتہا پسندی کے خاتمے کے لیے پُرعزم ہیں، دہشت گردی کے خلاف زیرو ٹالرنس کی پالیسی کے تحت بھرپور کارروائیاں جاری رکھی جائیں گی۔
وزیراعظم نے ایک مرتبہ پھر واضح کیا ہے کہ آخری دہشت گرد کے خاتمے تک چین سے نہیں بیٹھیں گے۔
واضح رہے کہ سانحہ آرمی پبلک اسکول پشاور کو گیارہ سال بیت گئے، آج ہی کے دن بزدل دشمن نے اسکول پر حملہ کر کے بچوں سمیت 147 افراد کو شہید کیا تھا۔
