فرمان الہی
نماز کے اوقات
بالی ووڈ کے رومانی کرداروں کے حوالے سے مشہور اداکار عمران ہاشمی نے اس وقت کو یاد کیا جب ان کے بیٹے کی کینسر کی تشخیص نے ان کی دنیا پلٹ کر رکھ دی تھی۔
اپنی حالیہ ٹیلی ویژن سیریز تاسکری کی کامیابی کی خبروں کے دوران انکا ایک پرانا انٹرویو سامنے آیا ہے، جس میں 46 سالہ عمران ہاشمی نے 2014 کا اپنی زندگی کا سب سے دردناک لمحہ یاد کیا، جب ان کے بیٹے ایان ہاشمی کو کینسر کی تشخیص ہوئی تھی۔ انہوں نے اس انٹرویو میں بتایا کہ اس واقعے نے ان کی توجہ کیریئر سے ہٹا کر ایک باپ کی ذمہ داری کی طرف مرکوز کر دی تھی۔
رنویر الہبادیہ کے ساتھ ایک گفتگو میں انہوں نے بتایا تھا کہ میری زندگی کا سب سے مشکل مرحلہ وہ تھا جب میرا بیٹا 2014 میں بیمار ہوا، میرے پاس الفاظ نہیں کہ میں یہ سب بیان کرسکوں کہ وہ وقت کیسا تھا۔
انہوں نے کہا کہ یہ پانچ سال تک جاری رہا۔ میری زندگی ایک ہی دوپہر میں بدل گئی۔ 13 جنوری کو ہم کھانے پر گئے اور ہم اپنے بیٹے کے ساتھ پیزا کھا رہے تھے، پہلی خبر اسی وقت سامنے آئی جب اس نے بتایا کہ اسکے پیشاب میں خون آیا ہے۔
عمران ہاشمی نے کہا کہ اگلے تین گھنٹوں میں ہم ایک ڈاکٹر کے پاس تھے، جس نے کہا کہ آپ کے بیٹے کو کینسر ہے۔ آپ کو اسکا اگلے دن ہی آپریشن کروانا ہوگا اور پھر آپ کو کیموتھراپی بھی کروانی ہوگی۔ تو میری پوری دنیا 12 گھنٹوں میں ہی الٹ گئی تھی۔
