فرمان الہی
نماز کے اوقات
وزیراعلیٰ پنجاب مریم نواز نے یومِ خواتین پر اپنا خصوصی پیغام جاری کر دیا۔
مریم نواز نے اپنے پیغام میں کہا کہ میں ہر اس عورت کی آواز ہوں جسے دبایا گیا، پنجاب کی بیٹی کمزور نہیں ریاست کا مضبوط بازو ہے، مظلوم نہیں بلکہ معمارِ وطن ہے۔
وزیراعلیٰ پنجاب نے کہا کہ پنجاب کی عورت آج تعلیم، تحفظ سے لے کر اقتدار کی راہداریوں تک بااختیار ہے، ہم نے پنجاب کی بیٹیوں کو پالیسی ساز، محافظ اور مفکر بنا دیا ہے۔
اُنہوں نے مزید کہا کہ کسی کی جرأت نہیں کہ وہ پنجاب کی کسی بیٹی کی طرف میلی آنکھ سے دیکھے، پنجاب کی بیٹیاں میری ریڈ لائن ہیں، ان کے تقدس پر کوئی سمجھوتہ نہیں ہوگا۔
مریم نواز نے کہا کہ پنجاب میں بیوہ خواتین اب تنہا نہیں، میں ان کے لیے رحمت کارڈ لا رہی ہوں۔
اُنہوں نے کہا کہ خواتین کے لیے وائی فائی، لیپ ٹاپ، ای بائیکس اور ہونہار اسکالرشپ کو یقینی بنایا ہے، خواتین کی حفاظت کے لیے سی سی ڈی اور پنک بٹن جیسے فول پروف اقدامات کیے ہیں۔
وزیراعلیٰ پنجاب نے یہ بھی کہا کہ پنجاب میں پہلا ویمن ورچوئل پولیس اسٹیشن قائم کیا جو خواتین کے تحفظ کے لیے کوشاں ہے، بارڈر ملٹری پولیس میں پہلی بار خواتین کی شمولیت میرے لیے باعثِ فخر ہے۔
