فرمان الہی
نماز کے اوقات
اسپین سے شکست کے خوفناک عمل سے نکلنے اوراسے بھولنے کیلئے فرانسیسی ایمباپے اینڈ کمپنی فیفا ورلڈ کپ فٹ بال ٹورنامنٹ میں انگلینڈ کے خلاف عمدہ کارکردگی دکھا کر تیسری پوزیشن حاصل کرنے کی کوششوں میں مصروف ہے۔
دوسری جانب انگلینڈ بھی سیمی فائنل میں ارجنٹائن کے خلاف برتری حاصل کرنے کے بعد شکست کا زخم تیسری پوزیشن حاصل کرکے بھرنے کی خواہش مند ہے۔ انگلش کھلاڑی اس میچ میں فتح کیلئے پرامید ہیں۔
فرانس اور انگلینڈ کی ٹیمیں فیفا ورلڈ کپ فٹ بال ٹورنامنٹ میں ہفتے کو تیسری پوزیشن کے میچ کیلئے میامی اسٹیڈیم میں مقابلہ کریں گی۔
ان دونوں روایتی حریفوں کا آخری ورلڈ کپ مقابلہ 2022 میں قطر کے کوارٹر فائنل میں ہوا تھا جس میں فرانس نے انگلینڈ کو 2-1 سے شکست دی تھی۔
فرانس کے پاس میچ جیت کر برتری جبکہ انگلینڈ کے پاس اس ہار کا حساب برابر کرنے کا سنہری موقع ہے۔
دونوں ٹیمیں چونکہ فائنل کی دوڑ سے باہر ہوچکی ہیں اس لئے یقینی طور پر تیسری پوزیشن کے میچ کو جیت کر اپنا اور شائقین کی مایوسی کا کچھ بوجھ ہلکا کرنے کی کوشش کریں گی۔
میچ کیلئے امکان ہے کہ دونوں منیجرز (ڈینیئل ڈیشامپس اور تھامس ٹوخل) ایسے کھلاڑیوں کو موقع دیں گے جنہیں ٹورنامنٹ میں کھیلنے کا کم وقت ملا ہے۔
فرانس کی ممکنہ الیون میں مائک مینیان (گول کیپر)، مالو گسٹو، میکسانس لاکروئے، ابراہما کوناٹے، تھیو ہرنینڈز، وارن زائر-ایمری، اینگولو کانٹے، مائیکل اولیسے، رین چیروکی، ڈیزیری ڈوئے اورکلیان ایمباپےکی شمولیت کا امکان ہے جبکہ فرانس کے دفاعی ستارے ولیم سالیبا اسپین کے خلاف سیمی فائنل میں زخمی ہونے کے باعث اس میچ سے باہر ہو چکے ہیں۔
انگلینڈ کی ممکنہ الیون میں جارڈن ہینڈرسن، ٹریوہ چلوپاہ، مارک گویہی، جان اسٹونز، ڈیڈ اسپینس، کوبی مینو، ایلیٹ اینڈرسن، مورگن راجرز، نوانی مادوویکی، ہیری کین، اور مارکس ریشفورڈشامل ہوں گے۔
تیسری پوزیشن کے میچ کیلئے ٹکٹوں کی قیمتیں بھی گری ہیں۔
سیمی فائنل میں شکست کے بعد فرانس اور انگلینڈ کے فینز کی مایوسی کے باعث ری سیل مارکیٹ میں ٹکٹوں کی قیمتیں تیزی سے نیچے گری ہیں، اور اب اس میچ کے کچھ ٹکٹ 1,000 ڈالر سے بھی کم کی قیمت پر دستیاب ہیں۔
