فرمان الہی
نماز کے اوقات
پاکستانی معروف اداکار اور ماڈل ارسلان بٹ کا کہنا ہے کہ میں اتنا کمزور نہیں کہ ساتھی اداکارہ کی جانب سے ہراسانی کے الزام کے بعد خودکشی کر لوں۔
ارسلان بٹ چند ماہ قبل اس وقت خبروں کی زینت بنے جب اداکارہ مامیا شاہ جعفر نے ان پر ہراسانی اور تھرسٹ ٹریپنگ کے الزامات عائد کیے تھے۔
بعدازاں ارسلان بٹ نے ان الزامات پر خاموشی اختیار کرنے کے بجائے اپنا مؤقف پیش کیا اور قانونی کارروائی کی، جس کے بعد مامیا شاہ جعفر نے اپنے الزامات واپس لے لیے تھے۔
حال ہی میں ارسلان بٹ نے ایک پوڈ کاسٹ میں شرکت کی، جہاں انہوں نے ان الزامات کے ممکنہ اثرات، اپنے کیریئر پر پڑنے والے دباؤ اور اس معاملے سے نمٹنے کے حوالے سے گفتگو کی۔
ایک سوال کے جواب میں ارسلان بٹ نے کہا کہ یقیناً ایسے الزامات کسی بھی شخص کے کیریئر پر اثر ڈال سکتے ہیں، میں اس معاملے کو انتہائی سنجیدگی سے لے رہا ہوں، مگر میں اتنا کمزور نہیں کہ ان کے سبب خودکشی کر لوں، بلکہ میں اس کا سامنا کروں گا۔
انہوں نے کہا کہ میں نے پاکستان ہی نہیں بلکہ بین الاقوامی سطح پر بھی بڑے بڑے ناموں کے ساتھ کام کیا ہے اور آج تک کسی نے میرے کردار پر انگلی نہیں اٹھائی، میرے دوست اور ساتھی میری خوش مزاج طبیعت کو پسند کرتے ہیں اور ہمیشہ میرے کردار کی تعریف کرتے ہیں، میں اس معاملے کا بھرپور طریقے سے مقابلہ کروں گا۔
معاملے سے نمٹنے کے حوالے سے اداکار نے کہا کہ میں اس صورتِ حال کا سامنا صبر، صبر اور صرف صبر کے ساتھ کر رہا ہوں اور قانونی راستہ اختیار کیا ہے، میرے پاس اس شخص کو خاموش کرانے کے ہزار طریقے ہیں، لیکن میں نے قانون کا راستہ چننے کا فیصلہ کیا ہے۔
