ڈی جی آئی ایس پی آر نے ایس ایس جی حوالدار کو میڈیا کے سامنے پیش کردیا

ڈائریکٹر جنرل (ڈی جی) انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری نے پریس کانفرنس کے دوران بھارت کا جھوٹ بےنقاب کرتے ہوئے ایس ایس جی حوالدار محمد آصف کو میڈیا کے سامنے پیش کردیا۔ اس شخص کے بارے میں بھارت نے دعویٰ کیا تھا کہ اس نے اسے مقبوضہ کشمیر میں شہید کردیا ہے۔ 

ڈی جی آئی ایس پی آر کا کہنا تھا کہ بھارتی فوج کے دعوے کے مطابق انہوں نے مقبوضہ کشمیر کے علاقے میں آپریشن کیا۔ 29 ستمبر کو بھارت کی جانب سے فالس فلیگ آپریشن اسٹیج کیا گیا۔

انہوں نے بتایا کہ 29 ستمبر کی رات کو بھارتی آرمی کی کور نےسوشل میڈیا پر ایک پوسٹ کی۔ بھارتی کور نے دعویٰ کیا کہ ایک دہشتگرد مارا گیا اور لشکر طیبہ کے دہشت گرد کی لاش بھی مل گئی ہے۔ دہشتگرد کا نام محمد آصف عرف ہاشم موسیٰ بتایا جارہا ہے۔

ڈی جی آئی ایس پی آر کے مطابق بھارتی نیوز ایجنسی نے سروس نمبر کے ساتھ تفصیلات کا دعویٰ کیا۔ بھارت نے دعویٰ کیا ہے کہ آصف نے مختلف علاقوں میں حملے کیے۔

ترجمان پاک فوج نے پریس کانفرنس کے دوران سابق ایس ایس جی حوالدار محمد آصف کو بھی میڈیا کے سامنے پیش کیا جس کے حوالے سے بھارت نے دعویٰ کیا تھا کہ اس نے آصف کو شہید کردیا۔

حیرت ہوئی اپنے گھر میں ہوں تو مجھے کیسے بھارتی فوج نے شہید کردیا: ایس ایس جی حوالدار محمد آصف

پریس کانفرنس کے دوران ڈی جی آئی ایس پی آر نے حوالدار محمد آصف کے میڈیا کے سامنے پیش کیا۔

لیفٹیننٹ جنرل احمد شریف چوہدری کا کہنا تھا کہ یہ ہے وہ شخص جو بھارتی دعوے کے مطابق ہاشم موسیٰ عرف آصف فوجی ہے۔ اس شخص کو بھارت نے لشکر طیبہ کا کمانڈر، دہشت گرد اور ایس ایس جی حوالدار بنا کر شہید کردیا۔

انہوں نے کہا کہ بھارت پاکستان میں دہشتگردی کےلیے دہشتگرد تنظیموں کو اسپانسر کرتا ہے۔ 

ڈی جی آئی ایس پی آر کا کہنا تھا کہ بھارت کے اس فالس فلیگ ڈرامے کی 6 وجوہات ہیں۔ ہم جانتے ہیں بھارت دنیا میں دہشت گردی پھیلانے والا سب سے بڑا ملک ہے۔ بھارت کی مکتی باہنی، ٹی ٹی پی کو فنڈنگ کوئی ڈھکی چھپی بات نہیں۔

ان کا کہنا تھا کہ ہمیں سمجھنا ہوگا کہ مقبوضہ کشمیر میں کیا ہو رہا ہے۔ مقبوضہ کشمیر دنیا میں سب سے بڑی جیل ہے۔ مقبوضہ کشمیر میں 10 لاکھ سے زائد بھارتی فوج اور دیگر اداروں کے اہلکار موجود ہیں۔ مقبوضہ کشمیر میں لوگوں کو ایک گاؤں سے دوسرے گاؤں جانے کےلیے اجازت لینی پڑتی ہے۔

لیفٹیننٹ جنرل احمد شریف چوہدری نے کہا کہ بھارت سمجھتا ہے کہ ہر مسئلے کو دہشت گردی سے حل کیا جا سکتا ہے۔ بھارت اپنی دہشت گردی کو چھپانے کےلیے دوسروں پر الزام لگاتا ہے۔ بھارت ایسے ڈراموں سے اپنی دہشت گردی پر پردہ ڈالنے کی کوشش کرتا ہے۔

فوج کا سیاست سے کچھ لینا دینا نہیں ہے، ڈی جی آئی ایس پی آر

ڈی جی آئی ایس پی آر نے کہا کہ ریاست ہے تو جمہوریت اور سیاست ہے، نیشنل ایکشن پلان سیاستدانوں نے بنایا اب اس پر عمل درآمد کریں، فوج کسی سیاسی معاملے پر جواب نہیں دے گی۔

ڈی جی آئی ایس پی آر کا کہنا تھا کہ بھارت کیسا ملک ہے، ابھینندن کو ایوارڈ دیا گیا کہ آپ نے اپنا جہاز گرا دیا۔

انہوں نے کہا کہ ہمارے پاس ایک ایسا ہمسایہ ہے جو سمجھتا ہے کہ ہر چیز کو جھوٹ سے سلجھایا جا سکتا ہے۔ بھارت کچھ کرنا چاہتا ہے تو آجائے ہمارا ردعمل بہت سخت ہوگا۔ یہ بدقسمتی ہے کہ ہمارا پالا گھٹیا دشمن سے پڑا ہے۔

ان کا کہنا تھا کہ مقبوضہ کشمیر میں بھارت جو کچھ کر رہا ہے اس سے اس کی ذہنیت کا پتہ چلتا ہے۔ بھارت مقبوضہ کشمیر اور اقلیتوں کے خلاف اپنے جرائم کا الزام محمد آصف پر نہ ڈالے۔

بھارت کی مکتی باہنی اور کالعدم ٹی ٹی پی کو فنڈنگ دنیا کے سامنے ہے۔ بھارتی فوج سیاسی ہوگئی ہے اس کا ایجنڈا ہندوتوا بن چکا ہے۔ بھارتی وزیراعظم اور دیگر ریاستی سطح پر کی گئی دہشتگردی کو فخریہ بیان کرتے ہیں۔ بھارت تخیلاتی شائننگ انڈیا میں رہ رہا ہے۔

انہوں نے کہا کہ دہشتگرد کلبھوشن یادیو بھارتی فوج کے لیے ہمیشہ کلنک کا ٹیکہ بنا رہے گا۔ بھارتی جاسوس رقم سے بھرے بیگ لے کر بلوچستان میں کیا کر رہا تھا۔

ترجمان پاک افواج کا کہنا تھا کہ ملکی سیکیورٹی پر کوئی سمجھوتہ نہیں کیا جائے گا۔ ملکی سلامتی کےلیے جو کرنا پڑا کریں گے۔

انہوں نے کہا کہ بھارت کوئی ڈرامہ کرنا چاہتا ہے تو کر کے دیکھ لے۔ دشمن کے ہر اقدام کےلیے مکمل تیار ہیں۔ آج کا ہندوستان انکاؤنٹرستان بن چکا ہے۔ ہمارا ہمسایہ ایک گھٹیا اور کم ظرف ملک ہے۔

ایک سوال کے جواب لیفٹیننٹ جنرل احمد شریف چوہدری نے کہا کہ پاکستان مکہ مشترکہ دفاعی معاہدے پر عمل درآمد کےلیے مکمل پُرعزم ہے۔

حرمین شریفین کا دفاع اور سعودی عرب کی سلامتی یقینی بنانے کیلئے تیار ہیں: ڈی جی آئی ایس پی آر

مکہ الائنس پر میڈیا پر بات نہیں کی جا سکتی۔ مکہ الائنس کے تحت دفاعی تعاون کی معلومات مکمل طور پر کانفیڈینشل ہیں: لیفٹیننٹ جنرل احمد شریف چوہدری

ان کا کہنا تھا کہ پاکستان کی سلامتی اور جغرافیائی سرحدوں کی حفاظت کےلیے کسی قسم کا کوئی سمجھوتہ نہیں ہوگا۔ افواج پاکستان، آئین کے تابع اور ریاست کے احکامات کی پابند ہے۔

ڈی جی آئی ایس پی آر نے کہا کہ پاکستان دنیا بھر میں دہشت گردی سے سب سے زیادہ متاثرہ ملک ہے۔ پاکستان گزشتہ 2 دہائیوں سے دہشت گردی کے خلاف لڑ رہا ہے۔

ایک سوال کے جواب میں ترجمان پاک افواج کا کہنا تھا کہ کسی کی سیاست کےلیے دہشت گردی کے خلاف جنگ پر کوئی سمجھوتہ نہیں کیا جا سکتا۔ ہمارے لیے سب سے اہم چیز یہ ہے کہ ریاست ہے تو سیاست ہے

بانی پی ٹی آئی سے متعلق پوچھے گئے سوال کے جواب میں لیفٹیننٹ جنرل احمد شریف چوہدری کا کہنا تھا کہ پاک فوج کا سیاست سے کوئی تعلق نہیں۔

ان کا یہ بھی کہنا تھا کہ خیبر پختونخوا اور بلوچستان میں شہریوں کے تحفظ کیلئے جو کرنا پڑا کریں گے۔ کالعدم بی ایل اے اور کالعدم ٹی ٹی پی میں کوئی فرق نہیں۔ دونوں کالعدم گروپوں کو افغان طالبان کی سپورٹ حاصل ہے۔