بی ایل اے کے مطلوب دہشت گرد نے سرنڈر کردیا

بلوچستان لبریشن آرمی کے انتہائی مطلوب دہشت گرد عبدالرسول عرف الیاس استاد نے اپنے ساتھیوں اور اسلحہ سمیت سیکورٹی فورسز کے آگے سرنڈر کردیا، ایف سی بلوچستان نے کوئٹہ میں عید کے موقع پر دہشت گردی کی بڑی کارروائی ناکام بنا دی۔

آئی ایس پی آر کے مطابق بی ایل اے کے انتہائی مطلوب دہشت گرد عبدالرسول عرف الیاس استاد نے اپنے ساتھیوں اور ہتھیارسمیت خود کو سیکورٹی فورز کے حوالے کر دیا۔ عبدالرسول بلوچستان کے علاقوں پسنی، کلانچ، دشت اور مند کے علاقوں میں دہشت گرد کارروائیوں میں ملوث تھا۔

آئی ایس پی آر کے مطابق عبدالرسول نے ریاستی رٹ کو تسلیم کرتے ہوئے سرینڈر کیا جو موثر خفیہ معلومات اور کامیاب آپریشن کے باعث قائم ہوئی ہے۔ عبدالرسول کے ہتھیار ڈالنے سے پسنی، کلانچ، دشت اور مند کے علاقوں میں استحکام اور امن قائم کرنے میں مدد ملے گی۔

دوسری جانب ایف سی بلوچستان نے عید کے موقع پر کوئٹہ میں دہشت گردی کی بڑی کارروائی ناکام بنادی، آئی ایس پی آر کے مطابق ایف سی نے سبزل روڈ کوئٹہ پر نصب دیسی ساختہ بم ناکارہ بنا دیا جبکہ دھماکہ خیز مواد اور آئی ای ڈی برآمد کرلی۔