دیگر ملکوں کی نسبت پاکستان دہشت گردی سے زیادہ متاثر ہے، تھریسامے

برطانوی وزیر اعظم تھریسامے نے اقوام متحدہ کی جنرل اسمبلی سے خطاب میں دہشت گردی سے متاثرہ پاکستان کو یاد رکھا۔

برطانوی وزیر اعظم نے سابق وزیر اعظم محترمہ بے نظیر بھٹو کا بھی ذکر کیا۔

برطانوی وزیر اعظم تھریسامے نے اقوام متحدہ کی جنرل اسمبلی سے خطاب میں بے نظیر بھٹو کو خراج تحسین پیش کرتے ہوئے کہا کہ یہ اُن خاتون کے قتل کا 10واں سال ہے جنہوں نے اُنہیں اور اُن کے شوہر کا ایک دوسرے سے تعارف کرایا تھا۔

تھریسا مے کا کہنا تھا کہ دہشت گردی سے پوری دنیا متاثر ہے لیکن پاکستان بہت سے ملکوں کی نسبت زیادہ متاثر ہے۔

انہوں نے کہا کہ جنرل اسمبلی میں موجود بہت سے لوگ بے نظیر بھٹو سے اچھی طرح واقف رہے ہیں، اسی ملک میں بے نظیر بھٹو کو ظالمانہ طریقے سے قتل کردیا گیا اور یہ قتل ان لوگوں نے کیا جو اقوام عالم کی اقدار کےخلاف ہیں۔

تھریسامے نے مزید کہا کہ بے نظیر بھٹو کا تعلق دہشت گردی سے سب سے زیادہ متاثر ملک سے تھا اور اُنہیں جمہوری جدوجہد، برداشت کو فروغ دینے اور ایک خاتون ہونے کی وجہ سے قتل کیا گیا۔