بی جے پی مقبولیت کیلئے اوچھے ہتھکنڈے اپنا رہی ہے، ممتا بنرجی

بھارتی ریاست بنگال کی وزیراعلیٰ ممتا بنرجی نے ایک بار پھر مرکزی حکمران جماعت بی جے پی پر فرقہ پرستی کی سیاست کا الزام لگایا اور کہا کہ ہندو یا مسلم خون سب کا لال ہے،اس لئے مجھے مذہب کے نام پر تقسیم کی سیاست سے نفرت ہے ۔

کولکتہ میں مختلف مقامات پر پوجا تقریبات کے افتتاح کے موقع پر ممتا بنرجی نے کہا کہ بنگال کے لوگ بی جے پی کی مذہب کے نام پر تقسیم کی سیاست کو ہر گز برداشت نہیں کریں گے،وہ یہاں اپنی مقبولیت کے لئے اوچھے ہتھکنڈے اپنا رہی ہے۔

انہوں نے کہاکہ حکمرانوں کا فرض ہے کہ لوگوں کو مذہب کے نام پر تقسیم کرنے کے بجائے متحدہ کریں ، مجھے ان لوگوں سے نفرت ہے جو اپنا وجود قائم رکھنے کے لئے کے لئے دوسروں کے مذہبی عقیدوں کا استعمال کرتے ہیں،مذہب لوگوں کا نجی معاملہ ہے جسے دوسرے پر تھوپا نہیں جاسکتا ۔

وزیراعلی ممتا بنرجی نے کہاکہ کچھ لوگوں نے مندر میں قابل اعتراض اشیا رکھ کر افواہ پھیلا دی ہے کہ ہندووں کے جذبات کو ٹھیس پہنچانے کیلئے ایسا کیاگیا ہے۔ ان میں سے ایک شخص کو لوگوں نے رنگے ہاتھوں پکڑا تو اس نے قبول کیا کہ وہ بی جے پی کا رکن ہے۔