ملک میں حکومت نام کی کوئی چیز نہیں ہے، مصطفیٰ کمال

پاک سر زمین پارٹی کے سربراہ مصطفیٰ کمال کا کہنا ہے کہ ملک کا سسٹم بیٹھ چکا ہے قوم کو ٹرک کی لال بتی کے پیچھے لگایا ہوا ہے جبکہ یہاں حکومت نام کی کوئی چیز نہیں ہے، ایڈمنسٹریشن کسی اور کاموں میں لگی ہوئی ہے۔

مصطفیٰ کمال پاکستان عوامی تحریک کے احتجاجی جلسے میں شرکت کے لیے آج لاہور پہنچے جہاں انہوں نے میڈیا سے گفتگو کرتے ہوئے کہا کہ ماڈل ٹاؤن میں 14 لوگوں کو گولیاں مار کر شہید کیا گیا۔ ’ظلم پر انصاف نہیں ہوا، خاموش رہتے تو ظالم کے ساتھی کہلاتے‘۔

انہوں نے کہا کہ احتجاج میں سب آئیں، ہمیں نہیں معلوم کہ یہ دھرنا ہے ہم تو جلسے کے لیے آئے ہیں۔ وزیر اعلیٰ پنجاب اور وزیر قانون پنجاب کو رپورٹ کی روشنی میں مستعفی ہوجانا چاہئے۔

اس موقع پر انہوں نے کہا کہ میں آج یہاں ایم کیوایم پاکستان پر کوئی کمنٹ نہیں کروں گا ۔