• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

نوازشریف میں ہمت ہے تو خلائی مخلوق کے نام بتا دیں،چوہدری شجاعت

آج کا اخبار
ملک بھر سے
06 مئی ، 2018
اسلام آباد(نمائندہ خصوصی)صدر پاکستان مسلم لیگ چودھری شجاعت حسین نے کہا ہے کہ معلوم نہیں نوازشریف نے کس کا نام خلائی مخلوق رکھا ہے ان میں ہمت ہے تو خلائی مخلوق کے نام بتا دیں،نوازشریف اگر عدلیہ، فوج یا دفاعی اداروں کو خلائی مخلوق کہہ رہے ہیں تو کوئی ان کو اداروں کو بدنام کرنے کی اجازت نہیں دے گا، اداروں پر تنقید اور الزام لگانا درست نہیں، پاکستان مسلم لیگ ہی تمام مسائل حل کر سکتی ہے، خیبرپختونخواہ کے عوام ایک بار اسے بھی موقع دیں انشاء اللہ انہیں مایوسی نہیں رہے گی، صحت، تعلیم، روزگار عوام کا حق ہے، ہم یہ ان کی دہلیز تک پہنچائیں گے، کے پی کے میں جو کام ہوئے وہ ہمارے ہی لوگوں نے کئے، وہ پارٹی کے مرکزی سیکرٹری جنرل طارق بشیر چیمہ کے ہمراہ پشاور میں صوبائی سیکرٹریٹ کا افتتاح کرنے کے بعد خطاب اور میڈیا کے سوالات کے جواب دے رہے تھے، نوازشریف کے جیل جانے کے سوال پر چودھری شجاعت نے کہا کہ فیصلہ آنے دیں میں نے فیصلہ نہیں دینا، ن لیگ کا حال اور مستقبل دیکھنے کیلئے کسی چشمے کی ضرورت نہیں وہ سب کے سامنے ہے لیکن یہ دیکھنے کیلئے کہ الیکشن ہوں گے خاص چشمے کی ضرورت ہے۔کنگز پارٹی کے سوال پر ان کا کہنا تھا کہ اس کا وجود نہیں لوگ اپنی مرضی سے دوسری پارٹیوں میں جا رہے ہیں وہ دودھ پیتے بچے نہیں ہیں، پاکستان مسلم لیگ میں آنے والوں کو خوش آمدید کہتے ہیں۔ انہوں نے کہا کہ پاکستان مسلم لیگ نے ہمیشہ چھوٹے صوبوں کی ترقی، حقوق کی بات کی اور عوام کی بلاتفریق خدمت کی، ماضی میں ہم نے کے پی کے میں غلط لوگوں پر انحصار کیا، ان لوگوں نے اپنی ذات کو تو مضبوط کیا لیکن بدقسمتی سے پاکستان مسلم لیگ کو مضبوط نہ کر سکے، پارٹی عہدیدار نچلی سطح تک رکن سازی کریں،چودھری شجاعت نے ایک سوال پر کہا کہ تمام مسلم لیگیوں کو متحد ہونا چاہئے، مسلم لیگ کی جڑیں عوام میں ہیں اور انشاء اللہ مستقبل اس کا ہے۔ انہوں نے کہا کہ 35 سال سے نوازشریف اقتدار میں ہیں اور اب صاف پانی فراہم کرنے کیلئے پھر 10، 20 سال مانگ رہے ہیں۔  
تازہ ترین