• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ممبئی واقعات پر بے وقت کی راگنی خودنوازشریف نے چھیڑی،سراج الحق

آج کا اخبار
اہم خبریں
15 مئی ، 2018
لاہور (نمائندہ جنگ)امیر جماعت اسلامی پاکستان سینیٹر سراج الحق نے کہاہے کہ ممبئی واقعات پر بے وقت کی راگنی خودنوازشریف نے چھیڑ ی اور اب جو وضاحتیں پیش کر رہے ہیں وہ ان کے لیے اور ان کی پارٹی کے لیے مزید مسائل پیدا کر رہی ہیں، انہیں اپنی غلطی مان لینی چاہیے تھی ۔ ان خیالات کا ا ظہار انہوں نے منصورہ میں جماعت اسلامی کی مرکزی مجلس عاملہ کے اجلاس سے خطاب کرتے ہوئے کیا ۔ سینیٹر سراج الحق نے کہاکہ قوم یہ تو جانتی تھی کہ نوازشریف مودی کے جگری یار ہیں مگر تین بار وزیراعظم رہنے والے شخص سے کسی کو یہ توقع نہیں تھی کہ وہ قومی سلامتی کے معاملات میں اس قدر بے احتیاطی کا مظاہرہ کریں گے جو ناصرف خود ان کی پارٹی کے لیے پریشانی کا سبب بنے گا بلکہ ملک و قوم کے لیے مسائل پیدا کرنے کا باعث ہوگا ۔انہوں نے کہا کہ ایک ایسے وقت میں جب پاکستان بین الاقوامی دباؤ کا شکار ہے تمام قائدین کو قومی معاملات پر احتیاط برتنی چاہیے ۔ سراج الحق نے 13 مئی کو مینار پاکستان کے سائے تلے ہونے والے ایم ایم اے کے کامیاب جلسہ عام میں عوام کی بڑی تعداد میں شرکت کو سراہتے ہوئے شکریہ ادا کیا اور کہاکہ ایم ایم اے قوم کی امنگوں کی حقیقی ترجمان ہے ۔ انہوں نے کہاکہ پاکستان جس عظیم مقصد کے لیے حاصل کیا گیا تھا ہم اس منزل کو حاصل کر کے رہیں گے اور اس کے لیے کسی قربانی سے دریغ نہیں کریں گے ۔ انہوں نے کہاکہ لاہور کے کامیاب جلسہ عام سے جہاں ملک میں اسلامی قوتوں کے حوصلے بلند ہوئے ہیں ، وہیں سیکولر ، لبرل اور عالمی استعماری قوتوں کے آلہ کاروں کے چہرے اتر گئے ہیں اور وہ پریشانی کا شکار ہیں ۔ انہوں نے امید ظاہر کی کہ ایم ایم اے آنے والے دنوں میں اپنی عوامی قوت میں مزید اضافہ کر ے گی۔ 
تازہ ترین