آپ آف لائن ہیں
جنگ ای پیپر
پیر10؍ربیع الاوّل 1440ھ 19؍نومبر2018ء
Namaz Timing
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

حد درجہ مصروفیات کے باوجود سیلیبرٹیز کی پُر کشش شخصیت، خوبصورتی اور بے داغ جِلد خواتین کے لیےتجسس کا سبب بنی رہتی ہے۔ ایسے میں اپنی پسندیدہ سیلیبرٹیز کی جِلدکی حفاظت کے معمولات کو جان کر اس تجسس کو کم کرنے میں مددمل سکتی ہے۔ اسی وجہ سے ہم اپنے قارئین کے لیے ہر کچھ عرصے بعد پسندیدہ سیلیبرٹیز سے متعلق کچھ نئی معلومات لے آتے ہیں تاکہ آپ ان کی خوبصورتی کے راز کے حوالے سے نہ صرف اپنی معلومات میں اضافہ کرسکیں بلکہ ان پر عمل کرکے اپنی خوبصورتی کو بھی بڑھا سکیں۔

سلینا گومز کا شمار ہالی ووڈ کی خوبصورت اور پرکشش اداکاراؤںمیں کیا جاتا ہے،ان کی آوازیا دلکش شخصیت کے علاوہ ان کا خوبصورت اور چمکتا ہوامعصوم سا چہرہ کروڑوں دلوں پر راج کرنے کے لیے کافی ہے۔ بیوٹی ایکسپرٹس کا کہنا ہے کہ خواتین کا میک اَپ ایسا ہونا چاہیے، جس سے چہرے کی معصومیت کم نہ ہو اور سلینا گومز کا میک اَپ اسی کی ترجمانی کرتا ہے۔ اس حوالے سے سلینا اورا ن کےمیک اَپ آرٹسٹ ہنگ وینگو کیا کہتےہیں، آئیے جان لیتے ہیں۔

چمکتی جِلد کا راز

سلینا کے میک اپ آرٹسٹ ہنگ وینگو کے مطابق ہالی ووڈ کی تمام اداکارائیں اپنے لیے وقت نکالتی ہیں لیکن سلینا اس معاملے میں کچھ زیادہ ہی محتاط ہیں۔ وہ عام افراد کے برعکس اپنی جِلد کو زیادہ سے زیادہ سے وقت دیتی ہیں اوریہی اضافی وقت ان کے چہرے کی جِلد کی تازگی اور چمک کا راز ہے۔

٭اس کے علاوہ سلینا ایکس فولی ایشن، فیس ماسک اور فیشل مساج کا زیادہ سے زیادہ خیال رکھتی ہیں۔

٭زیتون کا تیل ان کے بہترین بیوٹی پراڈکٹس میں سے ایک ہے۔ فیس واش ہو یا سن اسکرین دونوں میں ہی زیتون کا تیل بطور اجزاء لازمی شامل ہوتا ہے۔

٭جِلد کی حفاظت کے لیےبیس بنانے سے قبل وہ موئسچرائزرکا استعمال لازمی کرتی ہیں۔

خوبصورت اور چمکتے بالوں کا راز

انسان کی خوبصورتی میں بالوں کا کردار نہایت اہم ہوتا ہے اور اسی لیےان کی دیکھ بھال خاصی اہمیت رکھتی ہے۔ اگر عام خواتین کی بات کی جائے تو اکثر خواتین بالوں کو روز شیمپو کرتی ہیں کیونکہ ان کے خیال میں اس طرح بال زیادہ صاف اور چمک دار رہتے ہیں جبکہ وہ یہ نہیں جانتیں کہ بالوں کو روز شیمپو کرنے سے یہ کمزور اور روکھے ہو جاتے ہیں۔ اس لیے بہتر یہی ہے کہ بالوں کو ہفتے میں دو بار شیمپو کیا جائے، تاکہ ان کی مضبوطی اور چمک برقرار رہے۔اس حوالے سے سلینا بھی ماہرین کی اس رائے سے مکمل اتفاق کرتی ہیں۔ سلینا گومز کا کہنا ہے کہ وہ بالوں کو روزانہ دھونے کی قائل نہیں ہیں، وہ تین دن بعد بالوں کو دھوتی ہیں کیونکہ انھیں اپنے گھنے بال بے حد عزیز ہیں۔

پسندیدہ ورک آؤٹ

سلینا کے مطابق ’ Pilates‘ ان کی پسندیدہ ورزش ہے، یہ کرنے کے بعد وہ بہتر محسوس کرتی ہیں۔ ان کا کہنا ہے کہ اس ورزش کے ذریعے مختلف فوائد حاصل کیے جاسکتے ہیں، یہ کمر کے درداور جوڑوں کے لیے بھی مفید ہے۔

جِلد کی حفاظت کے 3مرحلے

سلینااپنی جِلد کی حفاظت کے لیے3اسٹیپس پر عمل کرتی ہیں۔ ان کا کہنا ہے کہ صبح کے وقت ورزش کرنے کے بعد جِلد کے حوالے سے تین چیزیں میرے پسندیدہ کاموں میں شامل ہیں۔

1۔سب سے پہلے فیس واش

2۔فیس واش کے بعد ٹونر کا استعمال

3۔ چہرے پر ہلکا ساموئسچرائزر

سلینا نہ صرف مختلف بیوٹی پراڈکٹس خریدنے کی بلکہ لگانے کی بھی شوقین ہیں۔ ان کا کہنا ہے کہ میرے پاس بہت سارے بیوٹی پراڈکٹس ہیں، جِلد کے حوالے سے میں لگی بندھی روٹین اور پراڈکٹس کو استعمال کرنے کے بجائے مختلف بیوٹی پراڈکٹس استعمال کرنے کی قائل ہوں۔

میک اَپ لُک

سلینا کے میک اَپ آرٹسٹ ہنگ وینگو کا کہنا ہے کہ سلینا پر نیچرل میک اَپ بے حد جچتا ہے اور وہ خود بھی ’نو میک اَپ لُک‘ کی شوقین ہیں۔ ایسا بہت کم ہوتا ہے، جب وہ ہلکے پیچ رنگ کی لپ اسٹک کے ساتھ گہرے آئی شیڈز کا استعمال کریں، ان کی اسکن ٹون نیچرل میک اَپ میں زیادہ دلکش اور متاثر کن محسوس ہوتی ہے۔ سلینا کی مداح بھی،جن کی اکثریت نوجوان لڑکیوں پر مشتمل ہے، ان کی ہی طرح میک اَپ سے زیادہ شخصیت میں نِکھار(Personality Grooming) لانے کو فوقیت دیتی ہیں۔

Chatاپنی رائے سے آگاہ کریں