راولپنڈی پولیس کا تھانیدار ایک برس تک بغیرپوسٹنگ آرٹی اےمیں کام کرتارہا

میرا شہر

اسلام آباد

19 اکتوبر ، 2018

راولپنڈی (سٹاف رپورٹر) بغیرپوسٹنگ راولپنڈی پولیس کا ایک تھانیدار ایک برس تک ریجنل ٹرانسپورٹ اتھارٹی میں کام کرتارہا۔اس کی پوسٹنگ راولپنڈی پولیس میں تھی جب کہ وہ غیرقانونی طورپر آرٹی اے میں کام کرتارہا۔ اس بے قاعدگی کاانکشاف ہونے ہونے پرسی پی اوراولپنڈی نے اے ایس آئی کوچارج شیٹ جاری کردی ۔ذرائع کے مطابق راولپنڈی پولیس کاہیڈکانسٹیبل نسیم شاہ ڈیپوٹیشن پرریجنل ٹرانسپورٹ اتھارٹی میں تعینات تھا اسی دوران ہیڈکانسٹیبل سے اے ایس آئی کے عہدے پرترقی کے لئے پروموشن بورڈکااجلاس ہواجس میں اسے راولپنڈی آرپی اوآفس طلب کیاگیا اوربعدازاں اسے اے ایس آئی کے عہدے پرترقی دے کراس وقت کے آرپی اونے اس کی پوسٹنگ راولپنڈی میں کردی لیکن مذکورہ اے ایس آئی دوبارہ ریجنل ٹرانسپورٹ اتھارٹی لاہورچلاگیا جہاں سے اس کی پوسٹنگ سیکرٹری آرٹی اے آفس چکوال کردی گئی اوراس آرڈرکی کاپی آئی جی پولیس پنجاب ،آرپی اوراولپنڈی آفس بھی بھیجی گئی جبکہ کاغذوں میں اس کی تعیناتی راولپنڈی پولیس میں تھی۔چندروزقبل جب یہ معاملہ سی پی اوراولپنڈی کے علم میں آیاتوان کے حکم پراسے طلب کیاگیالیکن وہ پیش نہ ہواجس پراسے معطل کردیاگیاجس پراس نے راولپنڈی رپورٹ کردی۔ ذرائع کے مطابق گزشتہ روزسی پی اونے اسے بحال کردیاتاہم اسے چارج شیٹ جاری کردی گئی ۔اس حوالے سے ذمہ داروں کاتعین ہوناباقی ہے کہ اس بے قاعدگی میں سی پی اوآفس کے کون سے اہل کاروں کی کوتاہی یابدعنوانی پائی جاتی ہے۔ اس معاملے میں سی پی اوآفس کی او ایس آئی برانچ اورایچ آرآئی ایم ایس برانچ کی کارکردگی پر بھی سوال اٹھ رہے ہیں کہ ایک ملازم راولپنڈی پوسٹنگ کے باوجودکس طرح تقریباً ایک برس تک دوسرے محکمے میں کام کرتارہا جبکہ اسے تنخواہ راولپنڈی پولیس کی جانب سے جاری ہوتی رہی۔

تازہ ترین