فرمان الہی
نماز کے اوقات
موسم سرما کو شادیوں کا سیزن (فیسٹو سیزن) بھی کہا جاتا ہے لیکن سردیاں شروع ہوتے ہی بالوں کے مسائل میں اضافہ ہوجاتا ہے۔ گھنے سے گھنے بال بھی گرنے، کمزور پڑجانے اور خشکی جیسے مسائل کا شکار ہوجاتے ہیں۔ اسی لیے ضرورت اس بات کی ہے کہ سرد موسم شروع ہوتے ہی نہ صرف آپ اپنی جِلد کی حفاظت کی روٹین میں تبدیلی لانے پر توجہ دیں بلکہ بالوں کی حفاظت کے انداز بھی بدل ڈالیں تاکہ شادی کے سیزن میںآپ کے خوبصورت بالوں کی چمک اور دلکشی ماند نہ پڑے۔ یہ تبدیلی کیسی ہونی چاہیے اس بارے میں بات کرتے ہیں۔
تیل سے دوری بالوں سے دشمنی
اگر آپ سرد موسم میں بالوں کی نگہداشت کے لیے تیل استعمال نہیں کرتیں تو جان لیجیے کہ آپ اپنے بالوں کی سب سے بڑی دشمن ہیں۔ تیل ہر موسم میںبالوں کو غذائیت فراہم کرتاہے۔ بالی ووڈ باربی کوئین کی بات کریں توبالوں کی حفاظت اور خوبصورتی کے لیےکترینہ باقاعدگی سے تیل لگانے پر یقین رکھتی ہیں۔ ان کا کہنا ہے کہ زیتون، کھوپرے، بادام یا کسی بھی تیل کا استعمال باقاعدگی سے کریں کیونکہ باقاعدگی سے تیل لگانا بالوں کے مختلف مسائل کا حل ثابت ہوتا ہے۔ ہفتے میں کم ازکم دوبار بالوں میں تیل ضرور لگائیں۔ سرد موسم میں بالوں کی چمک اور حفاظت کے لیے سرسوں یا زیتون کا تیل دو چمچ ہلکا گرم کرکے آہستہ آہستہ سر کا مساج کریں۔ سر میں نیم گرم تیل کا مساج کریں کیونکہ جِلد میں موجود سیبم بالوں میں نمی کو برقرار کھتا ہے۔
کیا بالوں میں خشکی بڑھ جاتی ہے؟
سردیوں میں بالوں کی خشکی کا بڑھ جانا بھی ایک عام مسئلہ ہے۔ اس سے نجات حاصل کرنے کے لیے جہاں بالوں میں تیل لگانا اہم ہے، وہیں مساج کرنا بھی سر کی خشکی سے نجات کے لیے ایک بہترین حل ہے۔ مساج کے لیے مختلف طریقے اختیار کیے جاسکتے ہیں:
٭ایلوویرا کے بے شمار فوائد سے سب ہی آگاہ ہیں لیکن کیا آپ جانتی ہیں کہ خشکی دور کرنے کے لیے بھی ایلوویرا جیل کی مالش کی جاتی ہے؟ شیمپو کرنے سے پہلے ایلو ویرا کے تیل یا جیل کی مالش کریں۔ ایلو ویرا میں ٹھنڈک کا عنصر خارش سے نجات دلانے میں مددگار ثابت ہوتا ہے۔
٭اپنی غذا میں سیب کے سرکے کا استعمال کریں۔ سیب کا سرکہ جہاںکئی فوائد کا حامل ہے، وہیں اس سرکے میں موجود پی ایچ خشکی کے لئے بہت مفید ہے، جو اسے پیدا ہونے سے بالکل روک دیتی ہے۔
٭ناریل کا تیل خشکی ہی نہیں بلکہ بالوں کے لیے بھی بے حد مفید ہے۔ غسل سے قبل تین سے پانچ چائے کے چمچ ناریل کے تیل سے اپنے سر کی مالش کریں اور کم ازکم ایک سے دو گھنٹے تک اسے لگا رہنے دیں، پھر سر دھولیں۔
بالوں کو کتنی بار دھونا ہے؟
سردیا ں شروع ہونے کا مطلب ہرگز یہ نہیں کہ بالوں کو ہفتے میں صرف ایک بار دھوئیں۔ آپ کا بال کم دھونا بھی بال گرنے کا سبب بن سکتا ہے۔ کولمبیا یونیورسٹی کی تحقیق کے مطابق تین دن میں ایک بار بال دھونا بالوں کی اچھی صحت کے لیے فائدہ مند ہوسکتا ہے۔
بال لمبے کیسے کیے جائیں؟
سردیوں میں عام طور پر نئے بالوں کی افزائش کم ہوجاتی ہے، تاہم اگر آپ گرتے بالوں کو روکنا یا کمزور بالوں کو گھنا کرنا چاہتی ہیں تو پیاز یا آلو کا عرق استعمال کریں۔ پیاز میں بڑی مقدار میں موجود سلفر، کولیجن کی پیداوار میں براہ راست اضافے کا باعث ہوتا ہے۔ اس مقصد کے لیے دو سے تین لال پیازوں کا عرق استعمال کیا جاسکتا ہےجبکہ آلو وٹامن اے ، بی اور کے کا حامل ہونے کے سبب بالوں کو گھنا کرنے کے لیے بہترین تسلیم کیا جاتا ہے۔
کنگھا تبدیل کریں
اگر آپ بال ٹوٹنے اور گرنے کے مسائل سے نجات چاہتی ہیںتو بہتر یہی ہے کہ بالوں کو بڑے دندانوں والے کنگھے سے سنواریں اور بہتر یہی ہے کہ کنگھا لکڑی کا ہو۔ برش یا چھوٹے دندانوں والے کنگھے سے بالوں کے ٹوٹنے کا امکان بڑھ جاتاہے۔ الجھے بکھرے بالوں میں کنگھا کرتے وقت ہیئر اسپرے کا استعمال ضروری ہے۔ یہ اسپرے آپ کے بالوں کو ٹوٹنےسے بچائے گا، وہیں بالوں کو سلجھانے میں بھی آسانی ہوگی۔
بالوں کی کاٹ چھانٹ
بالوں کی افزائش کے لیے ضروری ہے کہ غیر ضروری بالوں کی کاٹ چھانٹ باقاعدگی سے کی جائے۔ اگر آپ کے دو منہ کے بال ہیںتو بالوں کے مسائل سے بچنے کے لیے ان کی ٹریمنگ کرنا اشدضروری ہے۔ جب بھی آپ دو منہ کےبال دیکھیں تو قینچی لیں اور ان کو2انچ کاٹ دیں، یہ آپ کے بالوں کو صحت مند رکھنے کے لئے صحت مند سرگرمی ہے۔
