نندی پور تاخیر، بابر اعوان کی بریت درخواست پر فیصلہ مؤخر

20 فروری ، 2019

اسلام آباد کی احتساب عدالت نے نندی پور پاور پروجیکٹ میں تاخیر کے ریفرنس میں پی ٹی آئی رہنما بابر اعوان کی بریت کی درخواست پر فیصلہ مؤخر کر دیا۔

اسلام آباد کی احتساب عدالت کے جج محمد ارشد ملک نے کہا ہے کہ آج فیصلہ نہیں سنایا جائے گا، ابھی ریکارڈ کا جائزہ لینا ہے۔

انہوں نے مزید کہا کہ یہ تو طے شدہ بات ہے کہ پراجیکٹ میں تاخیر ہوئی، کیا تاخیر وزارت قانون کی وجہ سے ہوئی؟ یہ ابھی طے ہونا باقی ہے۔

دورانِ سماعت نیب پراسیکیوٹر نے مؤقف اختیار کیا کہ بابر اعوان کو بری کیا گیا تو باقی ملزمان بھی اس بات کی آڑ لیں گے۔

انہوں نے مزید کہا کہ سارے ملزمان بابر اعوان کے ساتھ جڑے ہوئے ہیں، باقی ملزمان تو کہیں گے کہ انہوں نے اپنا کام کر دیا تھا، آگے وزارت نے نہیں کیا۔

بابر اعوان نے کہا کہ آپ نے کہا کہ نندی پور منصوبے میں تاخیر ہوئی، ای سی سی نے یہ منصوبہ 27 دسمبر 2007ء کو منظور کیا، اس منصوبے میں تاخیر کے مختلف مراحل ہیں، 2009ء سے پہلے 14 ماہ گزر چکے تھے۔

انہوں نے مزید کہا کہ زاہد حامد اور فاروق نائیک اس وقت وزیر قانون تھے۔

واضح رہے کہ ملزمان پر نندی پور پاور پراجیکٹ میں تاخیر سے قومی خزانے کو 27ارب روپے کا نقصان پہنچانے کا الزام ہے۔

تازہ ترین