کراچی: کچرا چننے والے 4 بچے نالے میں ڈوب گئے

کراچی کے علاقے نارتھ ناظم آباد میں شاہراہ نورجہاں کے قریب کچرا چننے والے 4 بچے سیوریج کے بڑے نالے میں ڈوب گئے۔

بچوں کو نالے سے نکالنے کے لیے شاہراہ نور جہاں پولیس، چھیپا کے رضاکار اور فائر فائٹرز موقع پر پہنچ گئے ہیں جنہوں نے امدادی کام شروع کر دیا ہے۔

شارع نور جہاں پولیس کے مطابق جس جگہ پر حادثہ پیش آیا ہے وہاں پانی کا بہاؤ کافی تیز ہے، بچوں کو تلاش کرنے کے لیے پیشہ ور غوطہ خور موجود نہیں ہے تاہم فائر بریگیڈ اور امدادی اداروں کے رضاکار موقع پر پہنچ چکے ہیں جبکہ علاقے کے لوگ بھی اپنی مدد آپ کے تحت تلاش کا کام کر رہے ہیں۔

واضح رہے کہ کھلے سیوریج نالے میں بچوں کے گرنے کا یہ پہلا واقعہ نہیں ہے ،اس سے قبل نارتھ ناظم آباد، فیڈرل بی ایریا، لیاقت آباد، محمودآباد اور شہر کے دیگر علاقوں میں کئی بچے نالوں میں گر کر موت کا شکار ہو چکے ہیں۔