آپ آف لائن ہیں
جنگ ای پیپر
پیر 20؍ربیع الاوّل 1441ھ 18؍نومبر 2019ء
Namaz Timing
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
تازہ ترین
آج کا اخبار
کالمز

جِم جانے یا فٹنس کیلئے کچھ کرنے سے پہلے ضروری ہے کہ اپنے جسم کو توانائی فراہم کریں، جس کے لیے درست یا موزوں غذا کا انتخاب کرنا اس سے بھی زیادہ ضروری ہوتا ہے تاکہ آپ اپنا ورک آئو ٹ یا آئوٹ ڈور سرگرمی عمدگی سے انجام دے سکیں۔ مثال کے طور پر آگر آپ اپنی اسپن کلاسز لے رہی ہیں اور اس سے پہلے سبزی یا پھل کے جوس کو ایک صحت بخش آپشن تصورکررہی ہیںتو دوبارہ سوچیں ، کیونکہ اس سےآپ کا ہاضمہ متاثر ہوسکتاہے۔ آپ کی رہنمائی کے لیے ہم کچھ اسنیکس کا ذکر کررہے ہیں، جنہیںآپ جِم جانے یا فٹنس روٹین سے پہلے استعمال کرسکتی ہیں۔

چہل قدمی سے پہلے

اگر آپ کو اپنی بھرپور غذا لیے تین سے چار گھنٹے ہو چکےہیںاور ابھی بھی آپ کو شکم سیری ہے تو پھر کچھ بھی کھانے پینے کی ضرورت نہیں، بس آپ اٹھیں اور چہل قدمی کرنا شروع کردیں۔ لیکن اگر آپ صبح سویرے اُٹھ کر چہل قدمی کرنے کی عادی ہیں یا رات کا کھانا کھانے کے بعد خالی پیٹ محسوس کر رہی ہیں تو چہل قدمی پر جانے سے قبل ناشپاتی ، سیب ، ایک آدھ کیلا ، یا اسموتھی کا چھوٹا گلاس، پھلوں کےساتھ دہی یا بادام کا دودھ لے سکتی ہیں۔

دوڑنے سے پہلے

دوڑنے (رننگ) کیلئے بہت زیادہ طاقت اور اسٹیمنا درکار ہوتا ہے ۔ اس لئے ضروری ہے کہ رننگ سے پہلے صحت بخش غذا لی جائے۔ اگرآپ کو تیزابیت کی شکایت ہے توآپ کو ڈیری مصنوعات یا ترش غذائوںسے پرہیز کرنا چاہئے۔ اگر آپ کئی میٹر کی رننگ کرنے جارہی ہیں تو پھر آپ کو رننگ سے ایک گھنٹہ قبل اسنیکس کھانےچاہئیں۔ آپ کو نٹ بٹر کے ساتھ ٹوسٹ، کیلا یا چند بادام پستے، ایک چھوٹے سے پیالے میں دلیہ ، کوئی سا بھی آدھاپھل یا پھر چاکلیٹ بار کھانی چاہئے۔

مسلز ٹریننگ سے پہلے

طاقت کے استعمال والی جسمانی ورزش سےپہلے جسم کو تقویت پہنچانا ضروری ہے تاکہ مسلز کے کھلنے اور سکڑنےمیںآپ کو آسانی پیش آئے۔ اس سے آپ کی طاقت، ہڈیوں پر چڑھے مسلز کے سائز اوربرداشت میں اضافہ ہوتا ہے۔ اس لیے لازمی ہے کہ ورک آئوٹ سے پہلے جسم کو فیول مہیا کیا جائے، جس کیلئے آپ پروٹین شیک، سیب، پی نٹ بٹر کے ساتھ ایک ٹوسٹ، ہائی پروٹین اوٹ میل یا بلو بیری بنانا پروٹین اسموتھی لے سکتی ہیں۔

یوگا سے پہلے

یوگا کرنےسے پہلے بہت زیادہ کھانے سے پرہیز کریںکیونکہ آپ کو اس میں Twistکرنے والے آسن کرنے ہوتے ہیںجبکہ سرکے بل بھی کھڑا ہونا ہوتاہے۔ آپ فائبر سے بھرپورپھل جیسے کہ کیلا ، میوے، ایک پیالی بیریز ، اوٹ میل یا دوسری پکی ہوئی دالیں استعمال کرسکتی ہیں۔

سائیکلنگ اور اسپننگ سے پہلے

اگر آپ کی فٹنس روٹین میں سائیکلنگ اور اسپننگ شامل ہے تو آپ کو صحت بخش غذائیں اور اسنیکس ضرور استعمال کرنے چاہئیں، لیکن یہ اسنیکس ان سرگرمیوںسے ایک گھنٹہ قبل کھانے چاہئیں۔ اس سلسلے میں آپMUESLI (سوکھے پھلوں اور خشک میوے کو دودھ میں ملا کر بنائی جانے والی غذا)، دلیہ، ایک کیلا، انڈہ، ایک مشت خشک میوہ جات، گرلڈ کی ہوئی سامن مچھلی یا بھاپ لگی بروکلی کھاسکتی ہیں۔

سوئمنگ سے پہلے

سوئمنگ سے پہلے ایسی غذائوںسے اجتناب کریں ،جو آپ کا ہاضمہ خراب کرسکتی ہوں۔ آپ کم چربی والے دودھ سے بناایک پیالی دلیہ، جوس کے ساتھ ایک ٹوسٹ، ایک کیلا یا چاکلیٹ بار اور ایک مشت کشمش استعمال کرسکتی ہیں۔

درج بالا غذاؤں کی خصوصیات

فٹنس روٹین سے پہلے کی غذائوں کے بارے میں تو آپ نے جان لیا کہ کیا کھانا چاہئے، لیکن اگر ان کی افادیت آپ نہیں جانتیںتو جان لیں۔

پی نٹ بٹر کے ساتھ ٹوسٹ:گندم سے بنی ڈبل روٹی پر پی نٹ بٹر لگا کر کھانے سےجسم میں اضافی کاربوہائڈریٹس شامل ہو جاتے ہیں۔

خشک میوہ جات: جِم جانے سے پہلے خشک میوہ جات کھانے سے جسم کی توانائی بڑھتی۔ غذائیت سے بھرپور خشک میوہ جات دل کے دورے اور فالج کے حملوں سےبھی محفوظ رکھنے میں معاون ثابت ہوتے ہیں۔

پروٹین شیک : دن میں ایک سے زائد بار پروٹین شیک پینا آپ کیلئے خطرناک ثابت ہوسکتاہے۔ ورک آئوٹ سے پہلے اس کا استعمال جسم میںتوانائی بحال رکھنے کے کام آتا ہے۔ ورک آئوٹ سے پہلے پیے جانے والے پروٹین شیک میں ایک اسکوپ پروٹین ، آدھا کیلا اور بادام کا دودھ شامل کرلیا جائےتو بہتر نتائج حاصل ہوتے ہیں۔

کیلا: کیلے میں تین طرح کی قدرتی شکر سکروز، گلوکوز اور فرکٹوز ہوتی ہے، ا س کے علاوہ کیلئے میں ریشے یا فائبرزبھی پائے جاتے ہیں۔ اسی وجہ سے فوری توانائی حاصل کرنے کیلئے کیلا اہم سمجھا جاتاہے۔ کیلے کی یہی خصوصیت اسے دنیا بھر کے ایتھلیٹس کا پسندیدہ پھل بناتی ہے۔ 

خواتین کا جنگ سے مزید