فرمان الہی
نماز کے اوقات
فوزیہ کامران
اکثر خواتین عید کے موقعے پر اپنی تیاری کے ساتھ ساتھ گھر کی تیاری بھی بہت ذوق وشوق سے کرتی ہیں اور ان کی کوشش ہوتی ہیں کہ وہ گھر کی ہر چیز نئی خریدیں ۔ڈرائنگ روم اور بیڈ روم کے ساتھ کھانے کی میز کو بھی بہت خوبصورتی کے ساتھ سجائیں ۔میز پر خوبصورت ڈیزائن کا میز پوش اور ٹیبل میٹس بچھائیں۔مگر سب سے اہم کام کھانے کی میز پر برتن اور دیگر سامان سلیقے اور ترتیب سے لگانا ہے ۔کھانا لگانا اور برتنوں کو درست انداز میں ترتیب دینا خواتین کے ذوق اور سلیقے کی علامت سمجھا جاتا ہے ۔عید کے موقعے پر دعوت کے لیے مختلف ڈشز تیار کی جاتی ہیں ۔ اس لیے ٹیبل سیٹ کرنے میں خواتین کو تھوڑی پریشانی کا سامنا کرنا پڑتا ہے۔ اس لیے آپ کو ٹیبل سیٹ کرنے کے بارے میں چند باتیں بتا رہے ہیں ،جن پر عمل کرکے آپ عید دعوت کی ٹیبل کو خوبصورت بنا سکتی ہیں۔ سب سے پہلے خوبصورت میز پوش یا میٹس کا انتخاب کریں۔ اگر دسترخوان لگا رہی ہیں تو افراد کی تعداد کے مطابق میٹس سیٹ کریں۔ ہر میٹ کے سامنے بیٹھنے کے لیے آرام دہ فلور کشن لگائیں۔ پھر ہر میٹ پر برتن ترتیب دیں، دائیں جانب پانی اور مشروب کے الگ الگ گلاس رکھیں۔ درمیان میں ڈنر پلیٹ اور اس کے اوپر سلاد کی چھوٹی پلیٹ رکھیں۔ پلیٹ کے برابر سیدھے ہاتھ پر کھانے کے لیے کھانے کا چمچہ رکھیں۔ پلیٹ کے برابر بائیں جانب بڑا کانٹا اور سلاد کےلیے چھوٹا کانٹا رکھیں اور میٹھا کھانے کے لیے چھوٹا چمچہ اور اگر میٹھے میں فروٹس وغیرہ شامل ہیں تو اس کے لیے بھی علیحدہ ایک کانٹا برابر میں رکھ دیں۔ بائیں جانب میٹھا کھانے کی چھوٹی پلیٹ یا پیالی بھی رکھیں۔ دسترخوان یا ٹیبل کے درمیان میں کھانے کی ڈشزخوبصورت انداز سے سیٹ کردیں ۔
