سسیلین کی طرح پاکستانی مافیا بھی دباؤ ڈال رہا ہے، وزیراعظم

وزیر اعظم عمران خان کا کہنا ہے کہ سسیلین مافیا کی طرح پاکستانی مافیا بھی ہتھکنڈے استعمال کر رہا ہے اور دباؤ ڈال رہا ہے۔

سماجی رابطے کی ویب سائٹ ٹوئٹر پر وزیر اعظم عمران خان نے ایک بیان میں کہا ہے کہ یہ مافیا منی لانڈرنگ کے ذریعے بیرون ملک بھیجے گئے اربوں روپے کا تحفظ چاہتا ہے۔

انہوں نے مزید کہا کہ پاکستانی مافیا کی جانب سے رشوت، دھمکی، بلیک میلنگ، ریاستی اداروں اور عدلیہ کو دباؤ میں لانے کے لیے مختلف ہتھکنڈے استعمال کیے جا رہے ہیں۔

وزیر اعظم کا کہنا ہے کہ منی لانڈرنگ کے ذریعے بیرون ملک جمع دولت کے تحفظ کے لیے ریاستی اداروں اور عدلیہ پر دباؤ ڈالا جا رہا ہے۔