کراچی، فائرنگ سے ایک شخص جاں بحق، 7 ملزمان گرفتار

16 جولائی ، 2019

کراچی کے علاقے لیاری میں ڈکیتی میں مزاحمت پر فائرنگ سے ایک شخص جاں بحق ہو گیا جبکہ پولیس نے مختلف کارروائیوں میں باپ کے قتل میں ملوث ملزم بیٹے سمیت 7 ملزمان کو گرفتار کر کے ان کے قبضے سے اسلحہ برآمد کر لیا۔

پولیس کے مطابق کراچی کے علاقے لیاری میں میراں ناکہ کی گلی نمبر 14 کے قریب ڈکیتی میں مزاحمت کے دوران نامعلوم ملزمان کی فائرنگ سے 25 سالہ عدیل جاں بحق ہو گیا۔

دوسری جانب موچکو پولیس نے حب ریور روڈ پر پیٹرولنگ کے دوران 3 ملزمان کو گرفتار کر کے ان کے قبضے سے اسلحہ، منشیات، ایرانی ڈیزل اور مزدا ٹرک تحویل میں لے لیا۔

پولیس کے مطابق ملزمان منشیات فروشی اور ایرانی ڈیزل کی اسمگلنگ میں ملوث ہیں۔

ادھر 13 جولائی کو اورنگی ٹاؤن کے علاقے مومن آباد سے ملنے والی 50 سالہ شخص عمر کی لاش کا معمہ پولیس نے حل کر لیا، مومن آباد تفتیشی پولیس نے عمر کے قتل میں ملوث 2 ملزمان کو گرفتار کر لیا ہے۔

ایس ایس پی انویسٹی گیشن عابد بلوچ کے مطابق گرفتار ملزمان میں عبداللطیف اور سلیم شامل ہیں، 15 سالہ ملزم عبداللطیف مقتول عمر کا بیٹا ہے اور ملزم نے اپنے باپ کی غلط عادات کے باعث دوست کے ساتھ مل کر اسے بے دردی سے قتل کیا۔

ملزمان نے پولیس کو بیان دیا ہے کہ مقتول بیٹے اور اس کے دوست کو بد فعلی کرنے پر مجبور کرتا تھا اور جب بات برداشت سے باہر ہو گئی تو انہوں نے لوہے کی راڈ سے باپ کو قتل کر دیا۔

پولیس نے ملزمان سے آلۂ قتل بھی برآمد کر لیا ہے، گرفتار ملزمان اور مقتول باڑے میں ملازم تھے جبکہ ملزم سلیم اسٹریٹ کرائم، پولیس مقابلے اور ڈکیتی کی وارداتوں میں بھی ملوث ہے۔

دوسری جانب لیاری کے علاقے کلری سے پولیس نے 2 ملزمان کو گرفتار کر کے ان کے قبضے سے اسلحہ برآمد کر لیا، گرفتار ملزمان بھتہ خوری اور اسٹریٹ کرائم کی متعدد وارداتوں میں ملوث ہیں۔

تازہ ترین