دل کا مریض ہوں، کچھ ہوا تو یہ اسپتال نہیں پہنچا سکتے، زرداری

04 اکتوبر ، 2019

احتساب عدالت میں سابق صدر آصف زرداری نے بتایا کہ میری شوگر لو ہو جاتی ہے، دل کی بیماری ہے، ڈاکٹر نے اسپتال شفٹ کرنے کا کہا ہے، کچھ ہو گیا تو یہ لوگ ڈیڑھ دو گھنٹے میں اسپتال بھی نہیں پہنچا سکیں گے۔

اسلام آباد کی احتساب عدالت کے جج محمد بشیر نے آصفہ بھٹو کو آصف زرداری سے جیل میں ملاقات نہ کرانے پر دائر توہینِ عدالت کی درخواست پر سماعت کی۔

عدالت میں آصف علی زرداری کے وکیل سردار لطیف کھوسہ نے کہا کہ آصف زرداری جوڈیشل ریمانڈ پر ہیں، تاہم عدالتی حکم کے باوجود آصفہ بھٹو زرداری کی ان کے والد سے ملاقات کی اجازت نہیں دی جاتی۔

اس موقع پر سابق صدر نے بتایا کہ میری شوگر لو ہو جاتی ہے، دل کی بیماری ہے، میرے ڈاکٹر نے مجھے اسپتال منتقل کرنے کے لیے کہا ہوا ہے، مجھے کچھ ہو گیا تو یہ ڈیڑھ دو گھنٹے میں اسپتال بھی نہیں پہنچا سکیں گے۔

یہ بھی پڑھیے: دعائیں مولانا فضل الرحمٰن کے ساتھ ہیں: زرداری

عدالت میں وکیل نے کہا کہ پچھلی دفعہ جب زرداری صاحب کو اسپتال منتقل کیا گیا تو عدالت نے رپورٹ فراہم کرنے کا حکم دیا تھا جو آج تک فراہم نہیں کی گئی۔

احتساب عدالت نے آصفہ بھٹو کو اپنے والد آصف زرداری سے جیل میں ملاقات نہ کرانے پر فریقین کو نوٹس جاری کرتے ہوئے جواب طلب کرلیا اور سماعت 7 اکتوبر تک ملتوی کر دی۔

تازہ ترین