’زرداری کو کچھ ہوا تو حکمران ذمہ دار ہوں گے‘

17 اکتوبر ، 2019

پاکستان پیپلزپارٹی کے سینئر رہنما قمر زمان کائرہ کا کہنا ہے کہ آصف علی زرداری کو کچھ ہوا تو حکمران ذمہ دار ہوں گے۔

میڈیا سے گفتگو کرتے ہوئے پاکستان پیپلزپارٹی کے سینئر رہنما قمر زمان کائرہ نے کہا کہ جیل میں سابق صدر آصف علی زرداری کی صحت کو شدید خطرات لاحق ہیں۔ جیل اہلکار بھی ان کی صحت پر سخت تشویش کا اظہار کر رہے ہیں۔

قمر زمان کائرہ کا کہنا ہے کہ آصف علی زرداری کو شوگر، بلڈ پریشر، دل کی بیماری اور رعشہ کا مرض لاحق ہے۔

انہوں نے کہا کہ پیپلزپارٹی، حکومت، عدلیہ اور جیل انتظامیہ سے بار بار انہیں اسپتال منتقل کرنے کا مطالبہ کر رہی ہے لیکن آصف زرداری کی صحت کے بارے میں پیپلزپارٹی کی بات نہیں سنی جا رہی۔

قمرزمان کائرہ نے کہا کہ ہمارا مطالبہ ہے کہ آصف زرداری کو فوری طور پر اسپتال منتقل کیا جائے، اگر انہیں اسپتال منتقل نہ کیا گیا تو بھرپور احتجاج کی کال دی جائے گی۔

ذوالفقار علی بھٹو اور بی بی شہید کے بعد سندھ کے عوام کو ایک بار پھر غلط پیغام بھیجا جا رہا ہے، انہوں نے کہا کہ پیپلزپارٹی کے خلاف حکمرانوں کے انتقام کی آگ ٹھنڈی نہیں ہورہی ہے۔

قمر زمان کائرہ نے کہا صحت کی بنیاد پر آصف علی زرداری بلیک میل نہیں ہوں گے، پیپلزپارٹی اور بلاول بھٹو چٹان کی طرح کھڑے ہیں۔ گردن اور زبان کٹوا کر بھی جو شخص نہ جھکے اسے اب کیسے جھکایا جا سکتا ہے۔

اُن کا مزید کہنا ہے کہ ان سفاک اور بزدلانہ ہتھکنڈوں سے پیپلز پارٹی بلیک میل نہیں ہوگی۔

تازہ ترین