سپنوں کی دنیا میں لے جانے والا تکیہ تیار

17 اکتوبر ، 2019

مسائل میں گھرے لوگوں کو اکثر نیند کی کمی کا سامنا رہتا ہے اور اس بے چینی کو ختم کرنے اور مکمل راحت کی نیند لینے کے لیے انہیں دواؤں کا سہارا لینا پڑتا ہے۔

لیکن اب ایسا نہیں ہوگا کیونکہ انہیں سکون کی نیند سلانے اور خوابوں کی دنیا میں لے جانے کے لیے ایک روبوٹ تکیہ سامنے آگیا۔

گردے کی طرح دکھائی دینے والا یہ تکیہ سوم نوکس اپنی سریلی آواز کے ذریعے اسے استعمال کرنے والے کی سانس کو آہستہ آہستہ کم کردے گا جس کے ساتھ ہی وہ غنودگی میں جانا شروع ہوجائے گا۔

آرٹیفشل انٹیلی جنس کا حامل یہ روبوٹ موسیقی سناتا ہے، لوری دیتا ہے، دل کی دھڑکن کی آواز سناتا ہے جبکہ ایسی قدتی آوازیں پیدا کرتا ہے جو سونے والوں کو ان کی مسلسل خیالات سے دور کردیتا ہے۔

سوم نوکس کو نیدرلینڈز کی ڈیلفٹ یونیورسٹی آف ٹیکنالوجی کے طلبا نے تیار کیا ہے جسے مارکیٹ میں فروخت کے لیے پیش کردیا گیا ہے۔

ایک تحقیق میں بتایا گیا ہے کہ ایک تہائی لوگ سکون کی نیند حاصل نہیں کر پاتے اور یہی وجہ ہے کہ یہ تکیہ ان کی زندگی میں ایک نئی امید لائے گا۔

اس حوالے سے نیشنل ہیلتھ سروس برطانیہ کا کہنا ہے کہ اس کی مدد سے صرف ایک بالغ شخص ہی 8 گھنٹوں کی مکمل نیند لے سکتا ہے۔

سوم نوکس کو بنانے والوں کا دعویٰ ہے کہ یہ اپنے صارفین کو رات بھر طویل اور آرام دہ نیند دے سکتا ہے جبکہ یہ بہت آرام دہ بھی کیونکہ سونے والا شخص اسے آسانی کے ساتھ تھام سکتا ہے۔

ماہرین کا ماننا ہے کہ سونے کے لیے انسان کے دل کی دھڑکن آہستہ ہونا ضروری ہے کیونکہ دھیمی سانس ہی پوری رات بھرپور نیند کی سب سے بڑی علامت ہے۔

تاہم سوم نوکس میں یہی خاصیت ہے کہ وہ نہ صرف انسان کے دل کی دھڑکن کو بہتر کرتا ہے بلکہ اسے منٹوں میں آرام مہیا کرتا ہے۔

یہ کس طرح کام کرتا ہے؟

آرٹیفشل انٹیلی جنس کا حامل سوم نوکس اپنے جدید سینسرز کی مدد سے مختلف معلومات جمع کرتا ہے، جو اسے بتاتا ہے کہ آپ اس وقت جاگ رہے ہیں، غنودگی میں ہیں یا پھر گہری نیند میں چلے گئے ہیں۔

آپ کی نیند کی حالت کو مدنظر رکھتے ہوئے اس کا آرٹیفشل انٹیلی جنس کا حامل الگورتھم ڈیٹا کو جمع کرکے تکیے کو اسی کے مطابق رویہ اپنانے کی ہدایت کرتا ہے۔

یہ آپ کی سانسوں کا جائزہ لیتے ہوئے اس کے مطابق اپنی دھڑکن اور آواز کو متعین کرتا ہے تاکہ سانس لینے کا ایک متوازن نظام چلتا رہے۔

اس کے ساتھ ساتھ یہ ایسی ہی حرکت اور آواز پیدا کرتا ہے جو متعلقہ انسانی جسم کے لیے آرام دہ ہو جس کی وجہ سے وہ موثر انداز میں اپنی نیند پوری کر سکتا ہے۔

تازہ ترین