فرمان الہی
نماز کے اوقات
کیڈٹ کالج سانگھڑ میں 23 ویں سالانہ یوم والدین کی تقریب کا انعقاد کیا گیا، کمانڈر کراچی ریئر ایڈمرل زاہد الیاس تقریب کے مہمان خصوصی تھے۔
مہمان خصوصی اور کیڈٹ کالج سانگھر کے بورڈ آف گورنرز کے چیئر مین رئیر ایڈمرل زاہد الیاس نے اپنے خطاب میں نوجوان طلباء کی تعلیم و تربیت میں کیڈٹ کالج سانگھڑ کے کردار کو سراہا اور کالج کے تعلیمی معیار کے ساتھ ساتھ اعلیٰ ملٹری اور جسمانی تربیت کی بھی تعریف کی۔
انہوں نے اپنی انتھک محنت سے کالج کو قلیل عرصے میں سندھ کا بہترین ادارہ بنانے پر کالج کے اساتذہ اور اسٹاف کو خراج تحسین پیش کیا۔ قبل ازیں اپنے استقبالیہ خطاب میں کمانڈنٹ کیڈٹ کالج سانگھڑ کیپٹن محمد اشرف بھٹی نے کالج کی سالانہ رپورٹ پیش کی اور تعلیم، کھیل اور غیر نصابی سرگرمیوں کے میدان میں کالج کی غیر معمولی کارکردگی کو اجاگر کیا۔
انہوں نے گزشتہ سال کے دوران مکمل ہونے والے ترقیاتی کاموں اور جاری منصوبوں پر پیش رفت کے بارے میں بھی حاضرین کو آگاہ کیا۔ بعد ازاں مہمان خصوصی نے تعلیمی سال کے دوران مختلف شعبوں میں شاندار کارکردگی کا مظاہرہ کرنے والے کیڈٹس میں انعامات بھی تقسیم کئے۔
چیمپئن ٹرافی حسن علی آفندی ڈویژن کو دی گئی، اسٹک آف آنر کیڈٹ آصف علی اور کیڈٹ ثاقب حبیب کو بیج آف آنر سے نوازا گیا جبکہ کیڈٹ عبدالرسول اکیڈمکس میں قائداعظم ایوارڈ کے حقدار قرار پائے۔
تقریب میں والدین کی کثیر تعداد کے علاوہ ممبران بورڈ آف گورنرز، اعلیٰ سول اور فوجی حکام اور مہمانوں کی بڑی تعداد نے بھی شرکت کی۔
