فرمان الہی
نماز کے اوقات
کراچی(اسٹاف رپورٹر)پاکستان سپر لیگ فائیو میں کوئٹہ گلیڈی ایٹرز نے قومی ڈیوٹی کے باعث 7 مارچ تک عدم دستیاب کیمو پاؤل(سلور، سپلیمنٹری) کی جگہ سدرن پنجاب کے لیگ اسپنرزاہد محمود (سلور)کو جزوی طور پرٹیم میں شامل کرلیا ہے۔کوئٹہ کےمنیجر اعظم خان کا کہنا ہے کہ زاہد محمود کا تعلق سندھ کے علاقے دادو سے ہے۔زاہد محمود نے نیشنل ٹی ٹوئنٹی کے 24 میچز میں 35 وکٹیں حاصل کی ہوئی ہیں ۔ زاہد محمود نے قومی ٹی ٹونٹی میں 5.96 کا بہترین اکنامی ریٹ ہے ۔ زاہد محمود کے آنے سے کوئٹہ گلیڈیئٹر کا اسپین اٹیک مزید مظبوط ہوگیا۔زاہد محمود کے ہمراہ محمد نواز ، فواد خان اور ینگ آرش علی خان موجود ہیں۔ پاکستان سپر لیگ 2020 کے لیے کھلاڑیوں کے متبادل پر مشتمل ڈرافٹ، قذافی اسٹیڈیم لاہور میں منعقد ہوا۔ لیگ کے پانچویں ایڈیشن کا آغاز 20 فروری سے ہوگا۔ریپلیسمنٹ ڈرافٹ میں شامل فرنچائزز نے ابتدائی ڈرافٹ میں پک کیے گئے کھلاڑیوں کی عدم دستیابی کے باعث متبادل کھلاڑیوں کو مکمل یا جزوی طور پر ایونٹ میں شرکت کے لییپک کرلیاہے۔لیگ کے پانچویں ایڈیشن کے لیے پشاور زلمی اور کراچی کنگز نے 2،2 جبکہ لاہور قلندرز، کوئٹہ گلیڈی ایٹرز، اسلام آباد یونائیٹڈ اور ملتان سلطانز نے 1،1متبادل کرکٹر کو اسکواڈ میں شامل کیا ہے۔ ریپلیسمنٹ ڈرافٹ میں کراچی کنگز نے مکمل ایڈیشن کے لیے اسکواڈ میں 2تبدیلیاں کی ہیں۔ اس سلسلے میں لیام پلنکٹ (گولڈ، سپلیمنٹری) کی جگہ نیوزی لینڈ کے مچل میکلینگن(گولڈ) اور انگلینڈ کے ڈین لارنس (سلور)کی جگہ ویسٹ انڈیز کے چیڈوک والٹن (سلور)کو اسکواڈ میں شامل کرلیا گیا ہے۔ لیام پلنکٹ انجری اور ڈین لارنس نیشنل ڈیوٹی کے باعث کراچی کنگز کو دستیاب نہیں ہوں گے۔مچل میکلینگن گذشتہ ایڈیشن میں لاہور قلندرز جبکہ چیڈوک والٹن ایڈیشن 2018اور 2019میں اسلام آباد یونائیٹڈ کی نمائندگی کرچکے ہیں۔ پشاور زلمی نے جنوبی افریقا کے ڈوائن پریٹوریئس (سلور) کی جگہ انگلینڈ کے لوئس گریگری (سلور) کو مکمل ایڈیشن کے لیے اسکواڈ میں شامل کرلیا ہے۔ ڈوائن پریٹوریئس بھی نیشنل ڈیوٹی کے باعث پشاور زلمی کو دستیاب نہیں ہوں گے۔ویسٹ انڈیز اور سری لنکا کے درمیان سیریز کے باعث آلراؤنڈر کیرون پولارڈ (پلاٹینم) 7 مارچ تک پشاور زلمی کو دستیاب نہیں ہوں گے لہٰذا پشاور زلمی نے کیرون پولارڈ کی جگہ کارلوس بریتھ ویٹ (ڈائمنڈ) کو جزوی طور پر اسکواڈ میں شامل کرلیا ہے۔ کارلوس بریتھ ویٹ گذشتہ ایڈیشن میں لاہور قلندرز کی نمائندگی کرچکے ہیں۔قومی ڈیوٹی کے باعث ویسٹ انڈیز کے فابیئن ایلن (سلور)بھی مارچ کے پہلے ہفتے تک ملتان سلطانز کو دستیاب نہیں ہوں گے۔ فابیئن ایلن کی جگہ انگلینڈ کے وائن میڈسن (سلور) مقررہ وقت تک ملتان سلطانز کا حصہ ہوں گے۔ویسٹ انڈیز کے لینڈل سمنز(ڈائمنڈ، سپلیمنٹری) نجی وجوہات کے باعث ایونٹ میں شرکت نہیں کرر ہے ہیں، ان کی جگہ جنوبی افریقا کے ڈین ولاز (گولڈ)مکمل ایڈیشن میں لاہور قلندرز کی نمائندگی کریں گے۔اسلام آباد یونائیٹڈنے وان دیر دوسن(گولڈ، سپلیمنٹری) کی جگہ انگلینڈکے بلے باز ڈیوڈ ملان (سلور) کو مکمل ایڈیشن کے لیے اسکواڈ میں شامل کرلیا ہے۔وان دیر دوسن نیشنل ڈیوٹی کے باعث دستیاب نہیں ہیں۔ڈیوڈ ملان نے گذشتہ 4 ایڈیشنز میں پشاور زلمی کی نمائندگی کی۔
