فرمان الہی
نماز کے اوقات
وزیراعلیٰ سندھ مراد علی شاہ نے دوبارہ لاک ڈاؤن کے حوالے سے خبردار کرتے ہوئے کہا کہ گزشتہ روز لاک ڈاؤن کی ایس او پیز پر کسی نے عمل نہیں کیا، ایسا طریقہ کار نہ اپنایا جائے کہ حکومت کو دوبارہ سختی کرنا پڑے۔
وزیراعلیٰ سندھ نے صوبے بھر میں کورونا وائرس کی صورتحال سے متعلق بیان دیتے ہوئے بتایا کہ اس وبا کے 77ویں یوم 18 اموات ہوئی ہیں جو سب سے زیادہ ہیں۔
مراد علی شاہ کا کہنا تھا کہ گزشتہ 24 گھنٹوں کے دوران سندھ میں کُل 4064 ٹیسٹ ہوئے، 593 نئے کیسز رپورٹ ہوئے ہیں۔
انہوں نے بتایا کہ اب تک 99117 ٹیسٹ میں 12610 مثبت آئے ہیں، اس وقت 10163 مریض زیر علاج ہیں، 8668 مریض گھروں، 915 آئسولیشن مراکز اور 580 اسپتالوں میں زیرعلاج ہیں۔
مراد علی شاہ کا کہنا تھا کہ اسپتالوں میں موجود 82 مریضوں کی حالت تشویشناک ہے جبکہ 27 وینٹی لیٹرز پر ہیں۔
کراچی کی صورتحال سے آگاہ کرتے ہوئے مراد علی شاہ نے بتایا کہ شہر قائد میں 412 نئے کیسز رپورٹ ہوئے ہیں، ضلع جنوبی میں 124، ضلع شرقی میں 92 اور ضلع وسطی میں 63، کورنگی میں 51، ضلع غربی میں 45 اور ملیر میں 37 مزید نئے کیسز سامنے آئے۔
سندھ کے دیگر بڑے شہروں کے حوالے سے مراد علی شاہ نے بتایا کہ جیکب آباد میں 41، حیدرآباد میں 24، گھوٹکی میں 22 اور سکھر میں 9، ٹنڈوالہیار میں 4، لاڑکانہ میں 3، ٹنڈو محمد خان اور خیرپور میں 2-2 نئے کیسز ظاہر ہوئے ہیں۔
نرسز کا عالمی دن
مراد علی شاہ نے اپنے بیان میں نرسز کے عالمی دن کے حوالے سے کہا کہ آج نرسز کا عالمی دن ہے اور جدید نرسنگ کی بانی فلورینس نائیٹ اینگل کا جنم دن بھی ہے۔
نرنسز کے عالمی دن کے موقع پر مراد علی شاہ نے تمام نرسز، ڈاکٹروں اور پیرا میڈیکل عملے کو خراج تحسین پیش کیا۔
